Aizawlah Rualbanlote Ni hman a ni

December 3, Inrinni kha Rualbanlote Ni (International Day of Disabled Persons) a ni a, New Capital Complex-ah hman niin, MINECO Open Gym aṭanga Admi­nistrative Training Insti­tute (ATI) thleng walk­athon buatsaih a ni.

Rualbanlote Ni hmanna hi Social Welfare minister Dr K Beichhua'n a hmanpui a; thu sawiin, "Mizoram hi Kristian ram a nih angin, he ni hi uar zawka rilru leh thinlung tih tak zetna nen hman zel a ṭul. Rualbanlote hi mi bik an nih avangin duat tak leh hmangaih taka enkawla ngaihsak a ṭul a ni," a ti.

Rualbanlote'n dikna leh chanvo ṭha an neih theih nan Mizoram sorkarin nasa takin hma a la mek nia sawiin K Beichhua chuan, "Hna ṭha tak an hmuh theihna turin sorkar hnaah hauh­sak chin siam leh rual­banlote pension pawh kalpui mek a ni," a ti a; rualbanlote'n nuam ti tak leh hlim taka an tel ve theihna khawtlang din tur leh hmangaihna, lainatna leh duhsak taka rualbanlote enkawlna kawnga hma la zel turin Mizoram mipui a chah.

Dr K Beichhua chuan, Social Welfare department hnuaiah rualbanlote tan hamṭhatna hrang hrang - loan an lâk theihna tur te, chenna in nei lo tan chenna in ṭha siam te, zirna-in leh eizawnna tling thiamna pekte kalpui mek a nih thu te, tun hnaiah Tanhrila Tribal Art Centre-ah Braille Press hawn a nih thu te, Accessible India Campaign hnuaiah Mizoram sorkar pisa tam takah lift leh ramp, wheelchair hmangte tan dah a nih thu leh dah belh tura hmalak mek zel a nih thute a sawi bawk.

Kumina World Disabled Day thupui chu ‘Rual­banlote telna khaw­vel i din ang u’ tih a ni.