Thingfala lirthei chesualah mi pali an thi

Nimin zing khawvar hma khan Lunglei district-a Thingfál khaw dáiah lirthei, pick-up chesualin, kawng thlangah a lum a, lirtheia chuang zawng zawng, mi pali an thi.

Vanglaini thu dawn danin, lirthei hi Thingfal aṭanga km 1. vel, Lawngtlai district thlen hma lawkah kawng thlangah a tlan liam a, metre 300 vel a lum. Lirthei chetsual hun hi khawvar hma a ni a, an chesual tih nimin chawhma dar 10 velah hriat a ni. Hriat chhuah a nih veleh Central YMA hnuaia Disaster Respond Committee member te, Thingfal khawtlang leh police-ten ruang an zawng a ni.

Thingfal Branch YMA chuan kuang an siam a, ruang lak chhuah apiang chu kuanga dah niin, Thingfal YMA Hall-ah lak an ni a; thlahna hun hman a nih hnuah an khua panpui an ni.

Ruang pathum lak chhuah an nih hnuah pakhat chu a awmna hmun a awih deuh avangin lak chhuak lawk theih a ni lo. CYLA Disaster Respond Committee member-te hruia uaithlain tlai dar 5:15 velah an la chhuak thei a ni.

Mitthite chu puitling pathum leh naupang pakhat an ni a, Delhi aṭanga Krismas hmang tura haw leh hmuaktute an ni. Mitthite chu - Lalbahadur s/o Bathauha, Lalremtluanga s/o C Simona, Eliza s/o Robinchondro leh John-a s/o Risha, Lawngtlai district-a Sabualtlang khua vek an ni.