Silchar-Sylhet Festival-ah Governor a tel

Governor Hari Babu Kambhampati kaihhruaiin December 2, Zirtawpni zan khan Silchar-a Police Parade Ground-ah India leh Bangladesh ram palaite intawhkhawmna, Silchar-Sylhet Festival vawi khatna buatsaih a ni a; Culture, Tourism & DoNER enkawltu union minister G Kishan Reddy leh Bangladesh Foreign Affairs minister Dr AK Abdul Momen te khuallian an ni.

Hari Babu Kambhampati chuan, Silchar leh Sylhet khawpui chu insumdawn tawnna bakah, culture lamah pawh tun hma aṭanga inzawmna nghet nei tawh an nih thu a sawi a, "Inkungkaihna hi ram pahnihte inṭhian ṭhatna tinghettu atan hman kan duh. India leh Bangladesh hi tun hma aṭang tawha ṭhian ṭha an ni a, inlaichìnna hi hlâwk taka hman ṭangkai zel ni se," a ti.

Bangladesh aṭanga sumdawng telte chu India hmarchhakah huang zauh zel tura sáwmin Governor chuan, "India ramin Act East Policy chak takin a kalpui mek a, he hmalaknaah hian inkalpawhna ṭha ngaih pawimawh a ni. Tunah KMMTTP project hmangin Mizoram chu India hmarchhak leh Kolkata lawng chawlhna kawngpuiah a siam dawn," a ti a; Bangladesh sorkar leh sumdawngte chu Mizoram lam hawi tel turin a sáwm.

Bangladesh minister Dr AK Abdul Momen chuan, India leh Bangladesh inlaichìnna chu tun hma aṭangin a ṭha tih sawiin, " Tunah phei chuan economy ṭhang chak ber pahnih kan nih tawh avangin ram pahnih inlaichinna leh insumdawn tawnna hi khawvel huapin a pawimawh tawh. India tan Bangladesh chu Asia chhim lama sumdawnna kawnga a thawhpui lian ber a ni a, Bangladesh tan pawh India chu khawvel pum huapa a sumdawnnaah a thawhpui lian ber dawttu a ni mek," a ti.

Intawhkhawmna hi India leh Bangladesh ram insumdawn tawnna lian zawk neih theihna tur leh ram pahnih inlaichinna tinghet zual tura buatsaih a ni a; Assam Trasnport minister Parimal Suklabaidya leh India rama Bangladesh high commissioner Mohammad Mustafizur Rahman te chu khualzahawm an ni.