Raltlante hnenah ṭanpuina hlân

Mizo Students' Union (MSU) General Headquarters chuan December 3, Inrinni khan Bangladesh aṭanga Zo hnahthlak raltlan, Parva III khuaa awmte hnenah ṭanpuina an hlân a; Young Chakma Association-in ṭanpuina an hlàn bawk.

MSU hian Parva III-a raltlante chhawmdawlna atan Rs 10,000 an pe a, raltlan awm mekte an tlawh kual nghal. Central Young Chakma Association pawhin Inrinni khan Parva III-ah kalin, YCA aiawhin ṭanpuina - buhfai, chi, alu leh blanket ṭhahnem tak an hlan a ni.

MSU chuan, Parva III-ah Bangladesh aṭangin raltlan mi 295 an awm mek a, an zingah khawtlang hruaitu te, Evangelical Christian Church pastor leh Independent Baptist Church pastor te, nunau leh upa lamte an tel tih an tarlang.

MSU vice president Laldinsanga chuan, Bangladesh aṭangin Zo hnahthlak raltlan mi 295 an awm mek bakah, Mizorama luh tuma ramhnuaia la awm mek eng emaw zat an awm thu a sawi a, "Nunau leh kum upa lam thlabár tak chunga lo luh tum mek mi 117-te chu Kamtuli pelh ramri-ah BSF-te'n an lo dang hi a pawi kan ti a, an lo luh vek theih nan theihtawp kan chhuah dawn. Mizoramah him dam taka an lo luh hma chuan Parva khua leh a chhehvel kan chhuahsan dawn lo," a ti.

MSU chuan, Bangladesh aṭanga sahimna beiseia Mizorama lut mekte ngaihsak lehzual turin Mizoram sorkar an ngen tih an tarlang bawk.