Covid-19 vei 11 hmu chhuak Niminah mi 17 chhuahtir an ni

Zoram Medical College (ZMC) laboratory-ah July 28, Thawhlehnia mi 104-te swab sample endik aṭangin Covid-19 hripui vei mi 11 hmuh chhuah thar a ni a, nimin khan mi 17 chhuahtir an ni thung. Mizorama hripui vei hmuh tawh zawng zawng chu mi 395 an tling tawh.

Sorkar thuchhuaha a lan danin, Thawhlehnia ZMC-a Covid-19 vei hmuh chhuah thar mi 11-te hi Aizawl district-a mipa 10 leh Lawngtlai district-a hmeichhe pakhat an ni a, harsatna nei (symptom lang) an awm lo. Lawngtlai district-a hmeichhia hripui vei chu kum 37 mi, Assam aṭanga haw, quarantine facility-a awm lai a ni.

Aizawl district-a Covid-19 vei hmuh thar mi 10-te chu BSF sipai paruk, Mizoram police pakhat leh civil mi pathum an ni a; BSF sipaite chu kum 22-59 inkar, Maharashtra, West Bengal, Uttarakhand leh Uttar Pradesh aṭanga rawn lut te an ni. Mizoram police hripui vei hmuh thar chu kum 55-a upa, tun hnaia Nepal aṭanga haw a ni a, Aizawl a thlen veleha quarantine facility-a dah nghal a nih thu sorkar thuchhuahin a tarlang. Civil mi pathumte chu kum 24-33 inkar, Manipur, Bihar leh Nepal aṭanga rawn hawte an ni thung.

July 28-a ZMC-a sample test-te chu SRH-ZMC-a awm sa (thawk leh rinhlelh vanga dah luh) mi 24-te bakah, Aizawl, Lawngtlai leh BSF (Aizawl) aṭanga dawnte a ni.

Nimin khan Covid-19 vei zinga dam tawh mi 17 chu chhuahtir an ni. State Referral Hospital aṭangin mi paruk chhuahtir an ni a, Covid Care Centre (CCC) - Tribal Art Centre, Tanhril aṭangin mi 11 chhuahtir an ni bawk.

SRH-ZMC aṭanga chhuahtirte hi civil mi pahnih, BSF mi pahnih, Assam Rifles leh Assam Regiment mi pakhat ve ve, NDRF mi (doctor) pakhat leh Aizawl Civil Hospital-a DNB zir tur hmeichhia pakhat an ni a; CCC - Tribal Art Centre aṭanga chhuakte chu NDRF mi paruk leh Assam Rifles mi panga an ni.

Mizorama Covid-19 vei hmuh chhuah tawh zawng zawng chu mi 395 niin, mipa 297 leh hmeichhia 98 an ni a; vei tawh lo (negative tawh) mi 223 (56.46%) awmin, mi 172 (43.54%)-in an vei mek. Negative tawh mi 223 zinga 215 chu chhuahtir an ni tawh a, negative tih finfiah tawh BSF mi pariat erawh chu CCC-ah an la awm.

Covid-19 vei tawh mi 395 zinga mi 212 (53.67%) chu civil niin, mi 184 (46.32%) chu sipai mi leh sa an ni a; hripui vei vanga enkawl mek mi 172 zinga 41 (23.84%) chu civil mi niin, mi 131 (76.16%) chu sipai an ni. Civil mi hripui vei tawh mi 212 zinga 171 chu dam takin an chhuak tawh a, sipai 184 zinga 45 an chhuak tawh bawk.