Kut hnathawktute mangang au ráwlin min kai tho - Duhoma

ZPM leader Lalduhoma chuan, Mizo-ramah hmasawnnain kut hnathawktute a thlawh khûm an tam tih sawiin, kut hnathawktute mangang au ráwlin ZPM party chu a kaih thawh thu a sawi.

Lalduhoma hian December 2, Inrinni zan khan Chhingchhip Mualpuia vantlang inkhawmah thu sawiin, "Kan ramah hian deve-lopment-in a thlawh khûm kan tam em em. Kan unau, kut hnathawktute mangang au ráwl hian min kai tho a, chhantu ngaia an au ri hian kan beng a thleng a, chhantu an ngai em em a ni," a ti.

Sorkar siam tawhte'n sem policy hmangin mipui rilru sûkthlêk tichhe vek khawpin an kaihruai nia sawiin Duhoma chuan, "Thingtlang kut hnathawktute'n lo neih kan bànsan theih loh chhung hi chuan ZPM chuan loneitute tan budget-ah pawisa eng emaw zat dah a, a theihna kawng kawnga ṭanpui kan tum dawn," a ti a; kut hnathawktute chhanchuah theihna tur bána kaih (hand holding) policy an nei tih a sawi.

ZPM Leader chuan, loh theih loh avangin thingtlang loneih bànsan theih a la ni loh thu sawiin, ZPM an sorkar chuan thlai thar an lei dawn tih a sawi a, "Kan policy hmanga kan ram a dinchhuah theihna tura kan sawi ṭhin pali - thlai thar lei, vegetable supply chain, bul ṭanna pek leh loan lâk theih nana guarantor-a ṭante kan chhawp dawn, dingchhuak duhte chu an ding chhuak dawn khawp," a ti.

Lalduhoma hian chawlhkar kal ta khan Tuikum constituency-a khaw hrang hrang a tlawh a; ZPM zawm thar mi 232 a lawm lut niin ZPM thuchhuahin a tarlang.