PC-in LMC inthlan hmachhawn ngam lo-ah MNF sorkar an puh

Peoples' Conference party chuan December 3, Inrinni khan thuchhuah siamin, Mizoram sorkar chu kumin chhunga Lunglei Municipal Council (LMC) inthlan hmachhawn ngam lo-ah an puh a, an dem thu an puang.

PC party chuan, LMC nodal department UDPA changtu deputy chief minister Tawnluia'n LMC inthlan chu kum 2022 chhung ngeia buatsaih a nih tur thu a puang tawh tih sawiin, "MNF sorkar sûlhnu pawr leh hnûhma chhiat lutuk vang chauhin kumin chhungin LMC inthlanna kan nei thei dawn ta loah kan ngai," an ti.

LMC inthlan buatsaih turin an inpeih tawh tih State Election Commission-in kumin October thlaah Mizoram sorkar a hriattir tawh tih sawiin PC chuan, "MNF party-in LMC-ah sorkarna an chang zo dawn loa an inhriat vang chauha a changtu Deputy CM hian tikhawtlai luiah kan ngai a, demawm kan ti tak zet," an ti bawk.