Geology & Mining-in kuminah sorkarah cheng nuai 600 vel an chhûng lut tawh

Geology & Mining minister Dr R Lalthangliana hoin December 2, 2022 zan khan Geology & Mining Directorate kawtah department hotute an ṭhukhawm. Kumin chhungin sorkarah cheng nuai 600 vel an chhûng lut tawh tih tarlan a ni.

Dr R Lalthangliana chuan, sorkar department-in post thar a siam theih rih loh rualin, sum hnár ber ni thei tura thawktu Mining bikah post thar siam turin Cabinet-ah vawi hnih a thlen tawh tih a sawi a, "Thawhpuite pawh an inhawng hle. Thawktu kan indaih chuan tun ai hian kan thawk chhuak nasa ang a, sorkar department hi chak taka kal tur chuan thawktu indaih a ngai a ni," a ti.

Geology & Mining department chu department pawimawh a nih thu sawiin Minister chuan, "Mining lam hi kan thawh ṭhat chuan Zoram hmasawnna min thlen theitu a ni. Bangladesh Commerce Minister nen kan indàwr khan hmarcha, sawhthing, aieng tih vel mamawh tho mah se, lung an mamawhna a nasa a, kan lungte hi an ît em em a, nakin lawkah chuan lung aṭang hian sum hnár ṭha tak kan la nei dawn a ni," a ti a; Covid-19 léng lo se chuan Geology & Mining department-in nasa taka hma a sawn tur thu a sawi.

Tarlan danin, Geology & Mining department-ah hian director Lalṭhazuala hoin thawktu mi 46 vel an awm mek a ni.