Rilrua harsatna neite enkawlna tur hawng

Social Welfare minister Dr K Beichhua chuan December 3, Rualbanlote Ni khan Ainawn Vengah rilru lama rualbanlo damkawrte awmna tur, 'Rehabilitation home for persons cured of mental illness' a hawng.

Dr K Beichhua chuan, rilru lama rualbanlo, damdawi-in aṭanga chhuak tawh, hawna tur nei lo te, chhungkua leh ngaihven zuitu nei lote tana din home hawn a ni chu lawmawm a tih thu sawiin, "Khawvel ṭhang zelah rilru hmanna a tam zel a, rilru lama buaina a hring chhuak nasa a, rilru lama harsatna neite enkawlna kawngah mipui, kohhran leh khawtlang ṭan rual a ngai tak zet," a ti.

Minister chuan, rilru lama damlo leh rualbanlo, dam tawha ngaihte pawh dam hlen loh palh theih a nih thu sawiin, "Veng chhungah YMA leh khawtlang mipui nen thawhhona ṭha an mamawh dawn. Kumina Rualbanlote Ni thupui ‘Rualbanlote telna khawvel i din ang u’ tih hi chhawm nung zel ang u," a ti a; rilru lama rualbanlote tan khawvel ṭha leh muanawm siamtu ni zel turin kal khawmte a chah.

Home hawnnaah hian Ainawn Veng local council member te, YMA, MHIP, MUP leh Social Welfare depart-ment aiawhte an tel a ni.