EDC for Southern Mizoram hawng

Mizoram chhim lam district tana entre­pre­neurship (mahni kut­kawiha eizawnna) chung­chang inzirtirna leh entrepreneurship lama hmalakna hmun­pui tur, Lunglei Chanmari-a ‘Entrepreneurship Deve­lopment Centre (EDC) for Southern Mizoram’ chu HPC vice chairman Lawmawma Tochhawng, MLA-in a hawng.

Lawmawma To­chhawng chuan, EDC for Southern Mizoram chu chhim lam district-te tan hmasawnna rahbi pawimawh tak a nih thu sawiin, "Ram hmasawn turin mahni kutkea eizawnna kawng dap thiam entrepreneur-te Mizoramin a mamawh zel dawn. He centre-in a tum ber chu, ṭhalaite'n mahni thiam zawng leh tui zawnga eizawnna an dap chhuah theihna tura hmalak a ni," a ti.

Kum 2029 khan Lunglei district tan entrepreneur­ship lama intihsiakna ‘Lei­tlangpui Rahbi’ kalpui a nih thu sawiin HPC Vice Chairman chuan, "EDC hi ei leh bara kan intodelhna tura hmalakna péng pawi­mawh pakhat a ni," a ti a; Mizo ṭhalai zingah entre­preneurship lama tui, mahni kutkawiha dinchhuah tum, tum ruh leh beisei awm tam tak an awm thu a sawi.

Planning secretary Dr C Vanlal­ramsanga pawhin thu sawiin, entrepre­neurship chu ram hmasawnna nena kal kawp tlat a nih thu a sawi a, "Ram changkang apiangin entrepreneur an nei ṭha a, an hmasawnna an ngai pawi­mawh. Kan ramin hma a sawn zelna turah entrepreneurship - hna thawh tur zawngtu ni lo a, a ruaitu zawk nih chu bung thar kan kai theihna tur a ni," a ti.

EDC for Southern Mi­zo­ram kaltlang hian en­trepreneurship lama hma­lakna leh inzirtirna hrang hrang - lecture, semi­nar, webinar leh conference-te buatsaih ṭhin a ni ang.