I-Day lawm dan tur ruahman Sikul naupangte an parade dawn lo

GAD chuan July 28, Thawhlehni khan DC-te hnenah lehkha thawnin, kumina Independence Day hman dan tur a hriattir. GAD ruahmanna siamah hian, parade tur zingah sikul naupang an tel loh bakah, inhnam­hnawihna neihtir loh tur a ni.

GAD-in ruahmanna a siam hmaa Aizawla Independence Day hman dan tur rêl a nih ṭumin sikul 14 chu parade tura tih an ni. Hemi chungchangah Aizawl DC R Lalramnghaka chuan, GAD aṭanga order a awm tâk avangin parade tur zinga sikul telh chu sût (cancel) nghal a nih thu a sawi.

GAD ruahman dan chuan, Independence Day lawmna chu Aizawlah chuan zing dar 8-ah ṭan tur a ni a, district dangah chuan District Level Committee-te'n khuallian tur ráwn chunga ṭan hun tur ruahman tura tih a ni. Sub-division/block level-ah chuan dar 9 hnu lamah ṭan tur a ni thung.

I-Day lawmnaah hian Covid-19 léng vangin mipui punkhawm tam lutuk pumpelh tur a ni a, social distancing kaihhruaina zâwmin, hmai tuamna vuah tur a ni. Hetih lai hian, Aizawl DC R Lalramnghaka hoa DC conference hall-a I-Day Aizawla hman dan tur nimin khan rèl a ni a, parade contingent awm lo turin ruahmanna an siam. Covid-19 vangin punkhawm tam a rem lo a, sorkar hnathawkah pawh joint secretary leh a chung lamte chiah sawm tum a ni.

Nimin vêk khan district hrang hrangah bawrhsap hoin kumina Independence Day lawm dan tur hi rel a ni.