Mission Vengin Sikulpuikawn vel Zero Littering Zone-ah an puang

Mission Veng Local Council chuan an veng chhunga Sikul­puikawn leh a chhehvel chu bawlh­hlawh awm lohna leh bawlhhlawh paih khapna hmun, Zero Littering Zone-ah nimin khan an puang.

Sikulpuikawn leh a chhehvel Zero Littering Zone-a puanna inkhawm hi nimin chawhnu khan Sikulpuikawnah hman a ni a; Mission Veng LC chairman VL Chhuanawma'n kaihruaiin, bialtu MLA Lt. Col. ZS Zuala'n Sikul­puikawn leh a chhehvel chu Decem­ber 1, 2017 aṭangin Zero Littering Zone a nih thu a puang a ni.

Lt. Col. ZS Zuala chuan, Mission Veng khawtlangin faina kawng­ah nasa takin ṭan a la tih sawiin, "Aizawl khawpuia kawng pêng­ṭhuam tamna ber leh lûn ber lai hetiang taka mipuite'n kan vawng thei a nih chuan, Aizawl khawi lai hmun pawh hi kan vawng fai thei ngei ngei ang tih a chiang a ni,” a ti.

ZS Zuala chuan, Sikulpuikawn leh a chhehvelah bawlhhlawh paih phal lohna hmun a nih tawh angin, bawlhhlawh paih hmuh leh man an awm chuan, dan anga hrem an nih tur thu a sawi a; Sikulpuikawn vela kal

ṭhin zawng zawngte chu bawlhhlawh paih lo tura ngenin, a faina kawngah thawhpui turin mi tin a sáwm.

Aizawl Municipal Corporation-a bialtu councillor M Zohmingthangi pawhin thu sawiin, a bial chhunga Mission Vengin Zero Littering Zone an puang thei chu lawmawm a tih thu leh a lawmpui thu a sawi a; veng dang mite pawhin ṭawiawm a, khawlaia bawlhhlawh paih lo turin a ngen a ni.

Mission Veng LC leh an venga tlawm­ngai pawl dangte chuan Sikul­puikawn leh a chhehvel Zero Littering Zone-a puang tur hian hma an la a; joint resolution an pass hnuah, Sikulpuikawn leh a chhehvel tihfai leh rawng hnawih beihpui an thlak a ni.

Nimina Zero Littering Zone puan inkhawm tâwi neih zawhah PC Girls' School zirlaite kawngpui dung­ah bawlhhlawh chhârin an hnatlang zui bawk.

Mission Veng LC chuan, Decem­­ber 1, 2017 aṭangin Sikulpui­kawn leh a chhehvel khawlaiah bawlhhlawh paih khap tlat a ni tih sawiin, "Ni tin nilenga duty tur dah a ni a, khawlaia bawlhhlawh paih an awm chuan, bawlhhlawh an paih chhar turin duty-te'n an ngen nghal zel dawn a ni," an ti a; Mission Veng chhunga kawngpui lian zual dangte pawh tun aṭanga kum khat chhungin Zero Littering Zone-a chantir vek hman an tum thu an tarlang.