Project Pushpak-in an kum 50-na an lawm ; "In hnathawh Mizoramah a langsar reng ang" - CM

Project Pushpak chuan Novemner 30, Ningani tlai khan Lammualah an kum 50-na, golden jubilee an lawm a; an hun hmanpuitu, chief minister Lal Thanhawla chuan, Project Pushpak-te hnathawh chu Mizoram hmasawnna atan thil langsar ber pawl a nih reng tur thu a sawi.

Chief Minister chuan, Project Pushpak-te chu Mizoram tana hna ropui tak thawktu an nih thu sawiin, "In hnathawhah Mizo mipuite an lawm a, Mizoram hmasawnna atan in hnathawh hi thil langsar ber pawl a ni reng tawh ang. Mizoram buai chhoh ṭan tak tak lai, May 1967-ah Project Pushpak chu Mizoramah an rawn inbun nghet a ni," a ti.

Project Pushpak-te'n an hnathawhnaah harsatna tam tak an tawh thu sawiin CM Hawla chuan, "Chuti chung pawha beidawng loa an thawh avangin Mizoram chhim tawp leh hmar tawp inkar aṭanga ramri dep, khawthlang hmawr leh khawchhak kil thlenga kawng an siam avangin tun dinhmun hi Mizoramin thleng thei a ni," a ti a; kawng vangin Mizoramin hma a sawn phah thu a sawi.

Lal Thanhawla chuan, Pioneer-te leh Mizo mipuite thawhhona a ṭhat thu sawiin, "Rambuai chhung khan Project Pushpak avangin Mizo mipui tan kawng siamnaah hna thawh tur a awm phah a; pioneer ho kha sum hnár an nih piah lamah, eizawnna petu an ni tel. Pioneer-te hnathawh ṭhat leh an thil tih ropui takte Mizo mipuite'n an hre reng tawh dawn a ni," a ti.

Project Pushpak golden jubilee na lawmnaah hian Mizoram sorkar official, Assam Rifles leh BSF hotute pawh an tel a ni.

Border Roads Organisation (BRO)-in Mizorama hna an thawh hmasak ber ni turin kum 1963 khan Mizorama kawng awmchhun Silchar leh Aizawl inkar jeep road siam ṭha turin Project Sewak, Nagaland hnuaia 17 BRTF-te chu tirh an ni. Anni hian Silchar leh Aizawl inkar kawng siam ṭhat bakah, Aizawl-Lunglei inkar kawng zawn hna chu an thawk a, Lunglei-Aizawl kawng zawn hna chu kum 1963-ah an thawk zo.

Aizawl-Lunglei inkar kawng siam hna chak zawka thawk turin 8 BRTF leh 18 BRTF-te Mizoramah kum 1965 khan an rawn lut ve leh a; mahse, kum 1966-ah Mizoram a buai avangin kawng siam zawh hun tur 1967-ah kawng an siam zo hman ta lo a ni. Mizorama kawng siam hna nasa zawka thawk turin Project Pushpak hi May 1967-ah din a ni a; an din tirh aṭangin kawngpui (all weather road) km. 3,600-a thui leh lei (bridge) metre 2,200-a sei an siam tawh a ni.