Rualbanlote Ni pualin hun hmang

December 3, Pathianni hi International Day of Persons With Disabilities a ni a; Pathianni a nih avang­in Serchhipah leh Champhaiah chuan nimin khan hun hman a ni.

Champhaiah chuan Rualbanlote Ni hi nimin khan SSA leh RMSA ṭangkawp buatsaihin Kahrawt community hall-ah hman a ni a, DC Vanlalngaihsaka'n a hmanpui. Inkhawm zawhah rualbanlote tan intihhlimna hun Kahrawt field-ah hman chhunzawm a ni.

Champhai DC chuan, pian­phunga rualbanlote'n an chanvo dik tak leh dikna an vawnhim zel theih nana thawh chu thil tihmâkmawh a nih thu sawiin, "Khawvel changkang leh hmasawn ruala hma an sawn ve zel theih nana thawh chhunzawm zel a ṭul. UN Assembly chuan kum 1992 Assembly-ah Rualbanlote Ni-ah pawmin, kum tina hman turin thutlukna a siam a ni," a ti.

Vanlalngaihsaka chuan, Rualbanlote Ni hmang tura kalkhawm­te chu rualbanlote chanvo leh dikna humhalh a nih theihna atana thawk turin a sáwm a ni.

RMSA Champhai district hnuai­a Inclusive Education (IE)-ah rualbanlo zirlai 130 an awm mek a, allowance, hamṭhatna dang leh harsatna sutkian nan puihna hrang hrangte pek ṭhin a ni.

SSA Champhai district hnuaia IE-ah rualbanlo zirlai 438 an awm mek a; sikul thleng pha lo tan Ngúr, Vapar, Làmzáwl, Bungzung, Ngopa leh Champhaiahte home based education kalpui a ni. Champhai Vengthlang Primary School bulah resource room siam a ni a, exercise leh physiotherapy-te tihpui ṭhin a ni.

Serchhipah chuan Rualbanlote Ni pualin Zoram Entu Pawl leh RMSA bultumin BNRGSK Hall-ah hun hman a ni a, DC Sangchin Chinzah-in a hmanpui.

Sangchhin Chinzah chuan, taksa, pianphunga rualbanlo nih aiin rilru lama rualbanlo nih a hlauh­awm zawk tih sawiin, "Rualbanlohna hrang hrang neite chu sorkar mitah vohbik an ni a, an tana hmasawnna ruahmanna pawh kawng hrang hranga siam a ni," a ti.

Serchhipa Rualbanlote Ni pual hian Serchhip High School-ah rualbanlote thil siam chhuahte phochhuahna hun buatsaih a ni.