CS-in e-leave application a hawng

Internet online aṭanga leave application thehluhna tur, e-Leave Application chu nimin khan CS conference hall-ah chief secretary Lalmalsawma'n a hawng.

Chief Secretary sawi dan­in, e-Leave Application hi NEDP hnuaia Administrative Reforms Committee rawtna zûlzuia siam a ni a; a bul ṭan nan Mizoram sorkara secretary te, district administration (i.e DC Office leh Civil Sub Division), Rural Development Block leh Mizoram House-a thawk IAS leh MCS officer-te'n leave chi hrang hrang awlsam zawka an dil theihna tura siam a ni.

Sorkar department hrang hranga officer leh thawktu dangte pawhin an hman theih tura tihlen zel tum a ni bawk.

e-Leave Application hmang hian hmun kilkhawr leh state páwna officer-te'n leave dilna lehkha a hranga ziah ngai tawh loin, online-in computer emaw, mobile apps emaw hmangin awlsam takin leave dilna an thehlut thei dawn a; sorkar lam pawhin a hun takah leave an pe thei dawn a, a ṭul hunah chuan charge latu tur officer dang pawh rang takin a siam thei tawh dawn a ni.