KHAWTHLIR

Governor PS Sreedharan Pillai chuan tunhnai khan order ti chhuakin Assembly Session hun atan September 1, 2020 a ruat. Session hun chhung tur leh programme tur chu speaker Lalrinliana Sailo kaihhruai Business Advisory Committee-in an duang ang.

NSS State office huaihawtin nimin khan zirna-in hrang hranga NSS volunteer-te'n Aizawl Civil Hospital-ah thisen unit 26 an pe a, mipa 24 leh hmeichhia pahnih an ni. Thisen petute chu Mizo HSS aṭangin mi 13, Zemabawk HSS a-

ṭangin mi 10 leh JL HSS aṭangin mi pathum an ni. Baptist HSS aṭangin mi 11-in Christian Hospital, Serkawnah, CZ HSS aṭangin mi 25-in Kolasib District Hospital-ah an pe bawk. NSS-in nimina thisen an pek zawng zawng chu unit 62 a ni a, petute mipa 51 leh hmeichhia 11 an ni.

Lunglei Civil Hospital laboratory-ah July 28, Thawhlehni khan TrueNat-PCR hmangin mi 23-te swab sample endik a ni a, Covid-19 vei an awm lo. LCH laboratory-ah hian swab sample 958 endik a ni tawh. Thawhlehni vêk khan Rapid Antigen Test hmangin Kolasib-ah mi 23 leh Champhaiah mi parukte swab sample endik a ni a, hripui an kai lo vek.

State Planning Board vice chairman H Rammawi lehkhabu ziah 'Genting Highlands' tih chu nimin khan Planning  conference hall-ah Lok Sabha MP C Lalrosanga'n a tlangzarh. H Rammawi hian a lehkhabu thar hi MJA Public Library-a dah turin bu hnih a pe nghal a ni.

Legislative Assembly-a committee pakhat, Public Accounts Committee member-te chuan July 28, Thawhlehni khan CAG Report 2014-15 tlawhchhanin Industrial Training Institute, Aizawl an enfiah. PAC member-te hi acting chairman Vanlalhlana'n a ho a,  member dang KT Rokhaw, H Biakzauva leh Dr Van­lalṭanpuia te an tel a; ITI-a hmunhmate leh boys' hostel-te an enfiah a ni.