ZPM-in Lunglei veng hrang hrang an tuam

Ṭangrual pawl, Zoram Peoples' Movement (ZPM) chuan nimin khan Aizawla an pisaah inkhawm an buatsaih bakah, Ningani zan khan Lunglei khawpui chhung veng hrang hrangah vantlang inkhawm an buatsaih a, ZPM hruaitu hrang hrangin thu an sawi.

Aizawla ZPM pisaa thu sawi­tu Rev.Dr K Thanzauva, Zoram Exodus Movement (ZEM) hruaitu chuan, Mizote'n ram rorelna ṭha an neih thuai loh chuan an hmabak a thim hle niin a sawi a, "Ram rorelna ṭha loin rah ṭha lo tak tak a chhuah ṭhin a, kan ramah zu phalrai a nih avangin mipat hmeichhiatna hman khawlohna a thlen a, chu chuan HIV/AIDS kai kan tam phah em em a ni. Kan ram hian political change a mamawh a, chumi thlen theitu chu ZPM hi a ni a, ideal state kan siam dawn a ni," a ti.

Lunglei Venglaia Lalnun­tluanga ina inkhawm chu ZPM aṭangin Lalliansawta, K Sapdanga leh hruaitu ṭhenkhatte'n an hmanpui a; K Sapdanga chuan, Mizoram dinhmun chu enkawltu a nei ta lo em ni, tih mai awl tak a nih thu sawiin, "Sorkar ṭha, mipui sorkar, kalphung thar din tumin hma kan la ta a ni," a ti a; chief minister turah ZPM chu an buai loh tur thu te, an thawhho a ṭhat thute sawiin, ZPM chu ṭawiawm turin mipui a sawm a ni.

Chanmari-a inkhawmah ZNP president Lalduhoma leh ZPM hruaitu dangte an tel a, zawhna leh chhanna hun hman a ni. Lal­duhoma chuan, kum 2018 Assembly inthlanah ZPM-in sorkarna an chang a nih chuan Lunglei tana an hmalakna tur hrang hrang 12 a puang.

Lalduhoma chuan, ZPM-in sorkarna an chan chuan Lunglei district tan commissioner dah an tum thu te, Lungleiah municipal/panchayati raj an din tur thu te, ATR thlawhna ṭum theihna airport siam an tum thu te, Lunglei College leh JB College-te chu constituent college-a dah an tum thu te, chhim lamah Mizoram University Southern Campus hawn a nih ngei theih nan theihtawp chhuah an tum thute a sawi a ni.