KHAWTHLIR

Sipai lak rûnpui
Nimin zing aṭang khan Rajiv Gandhi Stadium, Mualpuiah sipai lâk rûnpui ṭan a ni a, recruiting director Col. Manish Natu-in a kaihruai a, December 6, 2017 thleng a awh ang. Sipaia intlar tur hian online-a application form thehlut a, admit card nei chauh tel phal a ni a, mi 2,400 an intlar. Physical test leh medical test paltlangte tan January 28, 2018-ah written exam neih a ni ang.

Charity Fund pe
Ritz Hotel neitute chuan an hotel kum 30 tlin champha lawm nan nimin khan MJA Charity Fund-ah Rs. 5,000 an pe. Ritz Hotel hian December 3-31, 2017 chhung an hotel-a thlen man leh ei leh in man 10%-in an tihniam dawn a ni.

Art expo
Oikos Little Angels School, Tuikhuahtlang chuan nimin khan an sikulah ni hnih awh tur Science Fair cum Art & Craft Expo an buatsaih a, zirlaite'n an thil siam chhuah an pho lang. Zirlaite chuan expo tlawhtute chu an thilsiam kalhmang leh siam chhan te an lo hrilhfiah zel a ni.

Jubilee lawm
Rosebud School chuan nimin khan an sikulah an sikulin kum 25 a tlinna, silver jubilee an lawm a, School Education minister H Rohluna khuallian a ni. H Rohluna chuan, private insititution-te mumal zawka department aṭanga enkawlna turin hmalak mek a nih thu a sawi. Rosebud School hi kum 1992-a din a ni a, zirtirtu 30 leh zirlai 870 an awm mek a ni.

Souvenir tlangzarh
Kawnpui High School-in an golden jubilee puala sovenir an buatsaih chu nimin khan bialtu MLA, Hmingdailova Khiangte-in Aizawl Press Club-ah a tlangzarh.

Khawfai lawm
Chhippui, Mamit district chuan Central YMA leh PHE department buatsaih, ram pum huap faina (sanitation) inelna lawmman pakhatna an lak chu tun hnai khan an lawm a, Mamit additional DC H Lianzela'n a hmanpui. Chhippui khua hi kum 1800-ah a ding ṭan a, páwn lama inthiarna awm lohna khua, open defecation free (ODF)-ah kum 2016 khan puan a ni.