VC/LC electoral roll tlangzarh a ni

Nimin khan district hrang hrangah district bawrhsap, district election officer (DEO) ni bawkte'n kumina village council leh local council inthlana hman tur electoral roll an tlangzarh a; political party hrang hrang leh tlawmngai pawl aiawhte an tel. Electoral roll-ah hian January 1, 2020-a kum 18 tling chin thun a ni.

Aizawlah chuan DEO R Lalramnghaka'n DC Confe­rence Hall-ah final electoral roll a tlangzarh a, Aizawl district-ah local council 83 leh village council 67 a awm. Aizawl district-a VC 67-ah voter 59,381 an awm a, mipa 29,055 hmeichhia 30,326 an ni a, draft roll aiin voter 87-in an tam zawk. Aizawl khawpui chhunga LC 83-ah voter 2,18,758 awmin, mipa 1,01,721 leh hmeichhia 1,17,037 an ni a; draft roll aiin mi 2,205-in an tlem zawk a ni. Lungleiah chuan DC Conference Hall-ah bawrhsap V Lalsangliana'n VC Final Electoral Roll, 2020 a tlangzarh a; Bawrhsap chuan, ram inrêlbàwlnaah VC inthlan a pawimawh hle tih sawiin, "Ram hmasawn hi a bulṭhut VC aṭanga ṭan a ngai. Kan hma lawkah VC election kan nei dawn a, chuta tana electoral roll dik leh felfai tak buatsaih a ni hi a lawmawm hle a ni," a ti.

Lunglei district-ah VC 113 awmin, chhungkua 30,030 an awm a, polling booth 124 a awm. Electoral roll tharah hian voter 87,460 awmin, mipa 43,585 leh hmeichhia 43,875 an ni a, draft roll aiin voter 275 (0.32%)-in an pung a ni.

Kolasib DEO Dr H Lal­thlangliana chuan electoral roll thar chu DC Conference Hall-ah a tlangzarh a, political party aiawhte hnenah an hlân nghal. Kolasib district-ah hian voter 60,634 awmin, mipa 29,435 leh hmeichhia 31,199 an ni a; VC 56 zingah Hortoki-ah vote nei an tam ber (2,777) a, Saihapui-V ah an tlem ber (171) thung. Roll tharah hian kum 2015-a VC inthlan lai aiin voter 9,761 (16.09%)-in an tam zawk.

Champhai DEO Maria CT Zuali pawhin IPR auditorium-ah electoral roll thar a tlangzarh a, "VC-te hi Mizo lalte thlâka khawtlanga roreltu an nih avang­in khawtlangah an pawimawh em em a ni," tiin, VC-te thuneihna chu beitham mah se, sorkar inrêlbàwlna pawimawh tak, hmasawnna ruhrel siamtu pawimawh an nih thu a sawi. Champhai district-a VC electoral roll tharah hian VC 62-ah voter 50,497 an awm a, mipa 24,666 leh hmeichhia 25,831 an ni. VC thar pahnih siam a ni dawn a, voter awm tamna khaw pakuaah polling station pahnih siam belh a ni dawn bawk. Khawzawl district a awm tawh avangin Champhai district-a Assembly bial ṭhin, Lengteng leh Tuichangte chu Khawzawl district-ah a bet tawh a ni.

Serchhip district electoral roll thar chu DC pisaah DEO Kumar Abhishek-a'n a tlangzarh. Bawrhsap chuan, eectoral roll tharah hian a awm sa mi 781 paih a nih laiin, mi 611 thun luh thar a nih thu a sawi. Serchhip district electoral roll tharah hian voter 47,070 awmin, mipa 22,944 leh hmeichhia 24,126 an ni a; draft roll aiin voter 170-in an tlem zawk. Serchhip district pumah VC 54 a awm a, chu'ng zinga pali - Serchhip Darnam, Serchhip Chanmari, Chiahtlang South leh Vanchéngte-te chu VC siam thar a ni. Mamitah pawh DC Conference Hall-ah bawrhsap Dr Lalrozama'n VC electoral roll thar a tlangzarh. Electoral roll tharah hian vote 65,841 awm­in, mipa 33,449 leh hmeichhia 32,392 an ni a, kum 2015-a VC inthlan lai aiin voter 14,682 (28.70%)-in an tam zawk. Roll tharah hian mi 1,593 thun belh a nih laiin, mi 866 paih an ni.

VC 90 a awm a, chu'ng zing­ah chuan VC thar Phuldungsei - Zampui VC, Lianbuang VC-te an tel a, Chhippui VC chu Chhippui-I leh Chhippui-II ah ṭhen a ni bawk. Hetih lai hian, kum 2015 inthlana Mamit district-a awm Lengpui erawh chu Aizawl district-ah a bet tawh thung. Tripura transit camp-a awm mek Bru voter 8,974 chu an awmna hlui VC-ah telh a ni. Khawzawl DEO Zothanmawia pawhin DC pisaah Khawzawl district a pian hnua an district-a VC electoral roll hmasa ber a tlangzarh. Electoral roll tharah hian voter 25,733 awmin, mipa 12,641 leh hmeichhia 13,092 an ni a; draft roll aiin voter 31-in an tlem zawk. Khawzawl district-ah hian VC 38 a awm a, voter tamna ber Khawzawl Vengthar­ah vote nei mi 1,782 awmin, voter tlemna ber Arro VC-ah vote nei mi 117 an awm.