Lungleiah department-te hnathawh thlir

Nimin khan Lunglei district-a sorkar department-te hnathawh thlir lêtna hun HPC confe­rence hall-ah buatsaih a ni a, HPC vice chairman Lawmawma Tochhawng, MLA-in a hmanpui. Ai­zawl aṭangin Planning secretary Dr C Vanlalram­sanga leh director Dr Lal­rinchhana te pawh an tel.

Lawmawma To­chhawng chuan, Lung­lei district-a department zawng zawng review meeting-ah tel tura hriat­tir an nih thu sawiin, "Meeting-in a tum ber chu - department-te hmalakna chiang taka hriat a, an harsatnate sutkian theih dan ngaihtuahho a, a theih ang ang district level-a chinfel tum a ni. Chinfel mai theih lohte chu state sorkar hotute hnena thlen tur a ni," a ti.

Meeting hi ni hnih awh tur a ni a, nimin khan PWD (Building), PWD Lunglei Division, PHE Rural Watsan, P&E Power Maintenance Division-I & II, UDPA, IWR, Agriculture, Horticulture leh Fisheries department hmalaknate thlirho a ni a; vawiinah department dang hmalakna thlirho leh a ni ang.