Chuktuah huan siam ṭhate hnenah lawmman sem a ni

Nimin khan Kolasib BRC Hall-ah Kolasib district-a midday meal hnuaia chuktuah huan siama ti ṭhate hnenah lawmman sem a ni a, district nodal officer Lalrambuatsaiha'n a hmanpui.

Lalrambuatsaiha chuan, "Midday meal hnuaiah chuktuah huan kan siam a, hei vang hian naupangte'n ei tur ṭha an dawn phah a, an hriselnaah a ṭha lam zawngin a nghawng a ni. Tunlai khawvelah zirtirtute'n ziak leh chhiar thiamtir piahah, kawng hrang hranga naupang enkawlnaah rilru kan sên thar a ṭul," a ti.

Kolasib district-ah midday meal dawng sikul 172 an awm a, chuktuah huan thlalak an theh khawm aṭangin a ti ṭha thlan a ni. Lawm­man dawngtute chu - pakhatna Kawnpui P/S-II, pahnihna Thingdawl M/S, pathumna LTM Upper P/S, Kolasib Project Vengte an ni.