Dan zâwm loa in sak AMC-in an kalh

Aizawl Municipal Corporation (AMC) Enforcement Committee chuan, AMC Building Regulations, 2012 zâwm loa Chanmari venga in sak nia an sawi, Dinary T Azyu ta chu nimin khan an kalh.

AMC Enforcement Committee chairman John Zosangliana (councillor) chuan, Enforcement Committee chu March 2022-ah din a nih thu sawiin, "Din a nih aṭanga rei lo têah he in chungchangah hian a hual vela chhungkaw parukin complaint an rawn thehlut a, vawi eng emaw zat warning kan pe a, an pawisa lo a, an sa lui ngat ngat a ni," a ti.

John Zosangliana chuan, Dinary T Azyu hnenah G6 Residential Building (ground floor bakah chhawng ruk tur) permit pek a nih thu sawiin, "Tunah hian G8 (ground floor bakah chhawng sarih)-in an sa a ni," a ti a; sak zawm tawh lo tura an tih pawha an tihtawp duh loh avangin pawi ti tak chungin an kalh ta tih a sawi.

AMC Enforcement Committee vice chairman Rosiamngheta chuan, dan anga kal an nih thu sawiin, "Dan hian a kawng zawh rawh se tih hi kan duh dan a ni. Dan bawhchhiat avangin chawitir a ni tawh a, dan a bawhchhe ta lo tihna a ni lo. Hetiang thil tih a ngai hi pawi kan ti a, dan zâwm tura a insiamrem vat kan beisei," a ti.

In hi Agape Multi-speciality Hospital atana luah mek niin, an inhawng ṭan tawh a, in kalh a nih lai pawh hian pan tum an awm nual a ni.

AMC ENFORCEMENT COMMITTEE TARLANTE
1) Dinary T Azyu hnenah March 26, 2019-ah residential building atan permission pek a ni a, ground floor bakah chhawng dang paruk sak phalna pek a ni. Kawng area lamah deviation a awm avangin LSC boundary pillar phun tur leh in sak lai titawp turin July 17, 2021-ah hriattir a ni.
2) Pillar a phun thu AMC a hriattir hnuah a hmunah enfiah a ni. Kawngpui àn lama LSC boundary-ah ban hmasa ber a awm a, ban aṭangin cantilever beam tihchhuah tumin RCC frame siam a ni a, set back awm miah loin ban an phun.
3) Drawing anga a sak loh avangin November 5, 2021-ah in sak lai angin OBPS-ah ni 15 chhunga thehlut turin hriattirna pek a ni. Chenna in tura permit pek a nih laiin, sumdawnna atan an duh leh tâk avangin chawng kuain an sa a, titawp tura hriattirna engahmah a ngai lo.
4) A ṭhenawm hnai chhungkaw parukin AMC Enforcement Committee-ah July 28, 2022 khan ziakin complaint an thehlut a, August 8, 2022-ah a hmunah enfiah a ni.
5) Executive Councillors meeting-a ngaihtuah turin Mayor hnenah August 10, 2022 khan thurâwn pek a ni.
6) Dan a bawhchhiat avanga chawi tur leh in sak mek chhunzawm tawh lo turin September 30, 2022-ah in neitu hriattir nawn a ni.
7) In sak chhunzawm zel a nih avangin November 9, 2022-ah chhunzawm tawh lo turin hriattir nawn leh a ni.
8) Dan zawm loh vangin in kalh turin December 2, 2022-ah order a chhuak a, December 5-ah kalh a ni.