Minister hoin kawng siam hna ṭan

Minister of state Robert Romawia Royte hoin nimin khan a bial, Aizawl East-II chhunga Chhinga Veng Bethany-ah inkalpawhna leh bungraw phurh luh theihna tura kawng siam hna thawh ṭanna leh Pathian hnena hlanna hun hman a ni.

Kawng siam hna hi Electric Vengthlang leh Chhinga Veng inrina lui kawra lei dawh aṭangin ṭan tur a ni a; lei leh kawng siamna atan Ministry of Tribal Affairs-in Social Welfare department kaltlangin cheng nuai 140 a pek bakah, SASCI sum cheng nuai 50 ruahman a ni.

Robert Romawia Royte chuan, kawng siamtu tur contractor Lalmuanawma Sailo, Bethlehem Vengthlang chu department hotu te, khawtlang hruaitute leh Bethany Welfare Committee hruaitute'n lungrual taka an ruat a nih thu a sawi a, "Bethany huam chhunga chhungkaw tam takin inkalpawhna siam a nih theih nan an ram hlu tak phal takin an pe a, a lawmawm tak zet. Kum li chhungin East-II ah lei pahnih dawh zawh a ni tawh a, hmun pali dangah dawh mek a ni," a ti.