Germany leh USA-ah Mizo hmarcha metric ton 4 vel hralh tum a ni - C Lalrinsanga

MNF adviser C Lalrinsanga, minister chuan nimin khan Mizo Hnam Rûna inkhawmah thu sawiin, Agriculture Product Marketing Committee Act Board an din dawn thu leh hmarcha metric ton 4 vel Germany leh USA-ah hralh tum mek a nih thu a sawi.

Agriculture minister C Lalrinsanga chuan, Agriculture-a rahbi thar an remte chu kum thum an kalpui leh chuan hmasawnna an neih ngei dawn thu a sawi a, "Agriculture Product Marketing Committee Act Board kan din dawn a, Chief Minister hoin ruahmanna kan siam mek. Kan thlai tharte tihral zung zung dan kan ngaihtuah dawn a, India ram mai ni lo, foreign country thlengin hralh kan tum. Hmarcha pawh metric ton 4 vel Germany leh USA-ah hralh tum mek a ni," a ti.

C Lalrinsanga chuan, buh tihṭhatna turin OB-12 hman ṭan tum a nih thu leh The Mizoram River Protection Bill hmang turin ruahmanna kalpui mek a nih thu a sawi bawk.

MNF Adviser chuan, MNF dintu Laldenga hoa kal khawmte chu tuipui ràl aṭanga chanchin ṭha meichher chhan chhuaktute ang an nia sawiin, "Anmahni zarah MNF chuan kum 60-na hmang theiin kan awm phah a, Israel fate Pathianin a chher dante nen MNF kalphung hi a inang hle. He hnamah hian MNF hmingin Pathianin chi a tuh tawh a, a la lêt tawh dawn lo," a ti.

MLA, district council, AMC, local council leh village council inthlanahte MNF party chu an chak char char tih sawiin Lalrinsanga chuan, "Hetiang renga Pathian min hriatna hi a awm ngai lo ang. Ram kalpui turin Pathianin kawng laklawhah min kalsan dawn lo," a ti a; MNF chu Mosia anga hnam tana meichher kengtu an nih thu a sawi.

C Lalrinsanga chuan, ZPM chu tangkáwng chaw ang deuh an nia sawiin, "Tawh leh khawih chêt hlekin an ṭeh hek hek a, a chhan chu ruhrel nghet rintlak an neih loh vang a ni," a ti a; MNF sorkara minister-te leh MLA-teah eptu lamin sawisel tur an nei lo niin a sawi bawk.