SEDP hi mipui bumna a ni - ZPM GS

ZPM general secretary Ngursailova Sailo chuan, MNF sorkar flagship programme SEDP atana kum li chhunga budget-a sum dah chu vbc. 2,175 a nih laiin, a taka hman tur an neih zat chu vbc. 949.34 a nih thu leh SEDP chu mipui bumna programme a nih thu a sawi.

Ngursailova Sailo hian nimin khan ZPM pisaa inkhawmah thu sawiin, SEDP atana sum budget-a an dah, intithei taka an sawi ṭhin chu vbc. 2,175 a ni a, mahse, a taka hman tur an neih zat chu vbc. 949.34 chauh a ni. Budget-ah kan dah an tih aṭanga sum hman tur an neih chu 43.64% chauh a ni a, vbc. 1,195.66-in an tlin lo ta pang a ni," a ti.

ZPM General Secretary sawi danin, SEDP atana Mizoram sorkar budget-a sum ruahman zat leh a taka hman theih zat chu - kum 2019-20 ah vbc 750 dah niin, a taka hman theih tura Finance-in a pawm zat chu vbc. 564.36 a ni a, kum 2020-20 ah cheng vbc. 325 dah niin, a taka an hman theih zat chu vbc 113.83 a ni. Kum 2021-20 budget-ah vbc. 400 dah niin, a taka hman theih tura tih chu vbc. 88.93 a ni a; kum 2022-23 budget-ah vbc 700 dah a ni a, a taka hman theih chu vbc. 200.22 chiah a ni bawk.

Ngursailova chuan, School Education department hman turin Mizoram sorkarin kum 2020-2022 chhungin cheng nuai 40,000 an pûk tawh niin a sawi a, "Sum pûkte hi a pung awm vek a ni. Rilru tina em emtu chu, contract amount aṭanga 30% leh a hnuai lam deuh vekin hna thawh a ni hi a ni. 70% lai contractor-te chan a ni hi mak a, heti taka thawk ṭha lote'n a hlâwkna an tél hi kan duh lo a ni," a ti.

ZPM General Secretary sawi danin, School Education department-in NABARD XXIV-ah cheng nuai 2,250 an pûk a, NABARD XXV-ah nuai 900 leh NABARD XXVI-ah nuai 1,134 an pûk bawk.

Ngursailova Sailo chuan, PMGSY sum hmanga Khawzawl leh Ngaizawl inkar kawng km. 12.49 siamna tura sum ruahman aṭangin MLA/Assembly speaker Lalrinliana Sailo-in cheng nuai 100 a pawt ṭhen nia sawi chungchangah, "He thilah hian kan Speaker hi eirûk thubuaia thiam loh chantir ngei tur a ni," a ti.

Ngursailova sawi danin, Khawzawl-Ngaizawl kawng siamna tura sum ruahman chu nuai 820.33 a ni a, contractor chu Colleen Lalsangpuii a nih laiin, a taka thawktu chu Romuanpuii a ni. Colleen-i manager thusawi aṭangin Lalrinliana Sailo-in cheng nuai 100 a lâk thu social media-ah a darh a, chumi kal zelah Romuanpuii'n cheng nuai 100 chu Lalrinliana Sailo hnenah mi dang kaltlangin a pek thu a sawi a ni.

Cheng nuai 100 pawt hêka inpuhna chungchangah ZPM Vigilance chuan Legal department nen ṭang dunin Lokayukta-ah complaint an thehlut a, chhui chiang turin Lokayukta-in ACB a ti a, ZPM Vigilance hotute pawhin November 1, 2022 khan ACB-ah statement an pe a ni. Khawzawl-Ngaizawl kawng hi November 13, 2017-a siam ṭan tura tih niin, November 13, 2019-ah siam zawh tura tih a ni.

Thusawi Ṭhenkhatte
▶ SEDP budget-a dah vbc. 2,175; a taka hman theih an neih zat vbc. 949.34 chauh
▶ Budget-a SEDP daha an insawi a taka tlin lohna vbc. 1,195.66
▶ School Edn dept tan kum 2020-2022 chhungin cheng nuai 40,000 an pûk tawh
▶ Khawzawl leh Ngaizawl inkar kawng siamnaah Speaker hi eirûk thubuaia thiam loh chantir ngei tur a ni