MPYCC-in MNF sorkar hotute Bânna thehlut turin an chah

Mizoram Pradesh Youth Congress Com-mittee (MPYCC) chuan, union minister khak ngai khawpa chief minister Zoramthanga kaihhruai Mizoram sorkarin sum an tichingpen chu hnam anga mualphona tàwp a nih thu sawiin, chief minister Zoramthanga hoin MNF sorkarin bànna thehlut se an duh thu an tarlang.

Nimina MPYCC thuchhuah chuan, Mizoram tlawhtu Minority Affairs minister of state John Barla-a'n Mizoram sorkar chu sorkar laipuiin sum a pekte tichingpen ṭhinah a puh tih a tarlang a, "Kristian ram inti ngam state-a thil thleng atan zahthlak a tih thu a sawi hi zahthlak kan ti tak zet a, hnam anga mualphona tàwp a nih avangin Pu Zoramthanga ho hian MNF sorkar hian Governor hnenah bànna thehlut ngei se kan duh," a ti.

John Barla-a'n a sawi- Ministry of Minority Affairs aṭangin infiamna, zirna, hostel sakna tur leh market sakna atan cheng vbc. 1,000 chuang Mizoram sorkar hnenah pek ni tawh mah se, Mizoram sorkarin utilisation certificate pek tur a nei lo chu zahthlak an tih thu sawiin MPYCC chuan, "Pu Zoramthanga kaihhruai sorkar hi ram hmasawnna dâltu leh Mizoram tiṭhuanawptu bakah, hnam dang leh central thuneitute hmaa hnam timualphotu an ni," an ti a; Mizoram sum báwm enkawl tlakah MNF sorkar an ngaih loh thu an sawi.

Congress ṭhalaite chuan, union minister-te khak ngaia awm tawh lo turin Mizoram sorkar an phût a; an party president Lalsawta chu sum leh pai enkawl thiam a nih thu sawiin, "Mizoramin sorkar ṭha kan neih thuai theih nan Congress party-ah rinna nghat turin mipui kan sáwm a ni," an ti.