Ramri chungchanga Mizoram sorkar dinnaah lawm
Joint Action Committee on Inner Line Reserved Forest Demand (ILRFD) chuan nimin khan Aizawl Press Club-ah thuthar thehdarhtute an kâwm a; Mizoram sorkarin Assam leh Mizoram ramri atana Bengal Eastern Frontier Regulation (BEFR), 1875 a dinpui tlat chu lawmawm an tih thu an sawi.
JAC on ILRFD chairman K Lianzuala chuan, Assam leh Mizoramin ramri tihfel ngai an neih avanga November 17, 2022-a state pahnih aiawhte inbiakna, Guwahati-a neihah Mizoram aiawhte'n Mizoram mipui, pawl leh political party zawng zawngte duh dan BEFR, 1875-an dinpui niin a sawi a, "Lawmawm kan ti a, an thurelte pawhin beiseina sang tak min pe. Mizoram sorkar chungah lawmthu kan sawi a ni," a ti.
JAC on ILRFD chairman K Lianzuala chuan, tun hmaa Mizo ram hauh chinte hun rei tak chhungin kil hrang hrangah Assam lamin an luah tawh nia sawiin, "A chhan ber chu, kha'ng hun laia sorkarna vuantu political party hrang hrang leh sorkar hnathawk ṭhenkhat inthlahdah vang a ni ber," a ti a; Assam-in Mizoram an luah mekte la let turin political party-te leh sorkar lama mawhphurtute theihtawp chhuah zel turin a ngen.
JAC on ILRFD hruaitute chuan, Assam leh Mizoram sorkar inbiakna kalpui a nih mek lai leh Zoram mipuiin BEFR 1875 ṭan chhana an din ngheh lai a, thil dang sawia article ziak leh social media-a thusawi ṭhin tam tak an awm chu ṭha lo an tih thu an sawi a, "Mipui rilru tiphír a, tichî-âi zawnga thil ti tawh lo turin kan ngen," an ti a; pawl leh political party-te pawh ramri thilah an pawl leh party tana hlâwkna neih tuma thil ti lo turin an ngen a ni.