KHAWTHLIR
No Tolerance Drive
Traffic SP Rodingliana Chawngthu chuan, December 12, 2022 aṭangin Aizawlah traffic dan bawhchhiate enfiah rûnpui leh inngaihhnathiamna awm loh hun, No Tolerance Drive/Checking kalpui a nih dawn thu a tarlang. Lirthei khalhtute chu dan zàwm a, document felfai nei tura chahin, dan zâwm lo leh bawhchhiate lakah ngaihhnathiamna a awm dawn loh thu a tarlang a ni.
Kolasib Press tour
MJA, Kolasib district member pasarih leh IPRO Hmingthanzuala te chuan Meghalaya-ah press tour an nei dawn a, nimin zing khan DC bangla kawt aṭangin Kolasib bawrhsap John LT Sanga'n a vailiam. Press tour hi December 9, 2022 thleng neih tur a ni a, Meghalaya state-a agriculture leh horticulture hmunhma te, NEIGRIHMS leh hmun dangte an tlawh dawn a ni.
Kawng khâr dawn
PWD chuan vawiin aṭangin Chite lei leh YRC, Falkland Veng inkar kawng an siam dawn a, hei vang hian hna thawh chhungin zing dar 9:30 aṭanga tlai dar 5 thleng kawngpui khâr a ni dawn. Hnathawh tibuai thei turin lirthei leh bungruate kawngpuiah dah/hûn phal a ni lo bawk.
Lungleiah mock drill
Lunglei khawpuia Saikuti Hall, Convention Centre leh Government High School-ahte vawiin chawhma dar 11 aṭangin Earthquake Mock Drill neih a ni dawn a, chî-âi lo turin mipui chah an ni.
World Soil Day
Lengpui KVK, Mamit district chuan nimin khan World Soil Day an hmang a, Lengpui Higher Secondary School zirlai te leh Mamit district hmun hrang hranga kut hnathawktute an tel. Mithiamte'n leilung humhalh leh enkawl ṭhat a pawimawhzia an sawi a; thlai chi leh soil health card sem a ni.
Ruihhlo dona
Champhaia Excise & Narcotics department, Sesih Presbyterian Kohhran leh Zomi Baptist Church-te chuan December 4, Pathianni khan Krismas leh kumthar thleng tur pualin Sesih community hall-ah ruihhlo do beihpui thlâkna hun, Anti-Drugs Awareness Campaign an buatsaih a; thupui chu 'Say no to drugs and yes to life' tih a ni.
G-20 meeting rêl
Mizoramin March 2023-a G-20 meeting a thlen tura core team leh sub-committtee hrang hrang chairman leh secretary-te chu nimin khan Home secretary H Lalengmawia hoin Secretariat conference hall-ah an ṭhukhawm. Sub-committee-te chanvo inhrilhfiah a ni a, December 8, 2022 hmain sub-committee member turte ruat ni se, an ti.
FOCUS enfiah
Champhai district-a FOCUS hmalakna hrang hrang ngaihtuaha ruahmanna siamtu District Coordination Committee on FOCUS member-te chuan nimin khan an chairman James Lalrinchhana, district bawrhsap hoin Champhai Zote-a FOCUS kaltlanga hmarcha sawngbawlna tura hmalakna an enfiah.
M/S zonal sports
Minister of state K Lalrinliana chuan nimin khan Kolasib Diakkawn khelmualah Middle School Zonal Sports Southern Zone a hawng. Zonal Sports-ah hian sikul pariat an tel a, December 9, 2022-ah khâr a ni ang. Minister chuan, zirna piah lamah rilru leh taksa hrisel a pawimawh thu leh infiamna hmangin taksa sâwizawi tam a ṭul thu a sawi.