Minister Zira'n Tuipuiral a tlawh kual
Minister R Lalzirliana chuan Thawhlehni leh nimin khan Champhai district chhung, Tuipuirala khaw hrang hrang a tlawh kual a, tun hnaia ṭum eng emaw zat lirnghing kaihhnawihah khawtlang hruaitute a kâwm.
R Lalzirliana hian Thawhlehni khan Khawbung leh Farkawn tlawhin, khawtlang hruaitute nen an inkâwm a; Tuipuiral Group YMA hruaitute nen Farkawn Middle School-a an inkawmnaah Tuipuiral Group YMA kutah ṭanpuina Rs. 50,000 a hlân. Nimin khan Vaphai, Samthang, Dungtlang, Leithûm, Leisenzo, Khuangleng leh Sesih khuate a tlawh leh bawk.
Mizoram khawchhak lama chêngte'n lirnghing vanga harsatna an tawhte a hmun ngeia tlawha hriatpui tura zin a nih thu sawiin R Lalzirliana chuan, "Tih theih tam em em lo mah se, theih ang tâwka hmalak theihna zâwna ṭan lakpui ka inhuam a, Covid-19 vangin sorkar sum dinhmun ṭha tâwk lo mah se, theihtawp chhuaha in harsatnaa hmalak sorkarin a tum a ni," a ti.
R Lalzirliana chuan, lirnghing tuar Tuipuiral khaw hrang hrangte tan solar street light 100 sem a nih tur thu sawiin, light 100 bakah, a awm sa 71 nen a vaiin solar street light 171 an ken thu a sawi a; solar study lamp man pawisa pek lâwk tawh 855 sem tur an ken thu leh 945 dang an kente pawh subsidy rate-a khul theih tura ruahman a nih thu a sawi bawk.