Kawngpuia lirthei riah endik ṭan Lirthei mante pawisa chawitir dawn

Coordination Committee on Traffic Management hnuaia Working Group Committee member-te chuan, December 1, 2017 zan aṭang khan lirthei neite'n a dahna garage an neih leh neih loh an enfiah ṭan a, kawngpui sira lirthei dah eng emaw zat an man. Lirthei an man zingah hian veng/hmun dang aṭanga lêngte lirthei pawh a tel nia thu dawn a ni.

Tarlan tawh ṭhin angin, Mizoram sorkarin lirthei nei zawng zawngte garage nei vek tura kum khat chhung hun a pek chu November 30, 2017 khan a tâwp a; December 1 zan aṭang­in thuneitute'n garage ni lo leh kawngpui sira lirthei riahte enfiah hna an ṭan a ni.

Garage nei leh nei lo en­fiahnaah hian Working Group Committee member te, Tran­sport department mi te, Traffic police-te leh local council hotute an tel a; December 1 zan khan 8-ah Aizawl SP pisa tualah kal khawmin, Working Group Committee chairman Lalbiakzama, Home department additional secretary-in lirthei endikna ṭan a nih thu a puang. Chumi hnuah team pangaah insiamin, endik hna an ṭan a ni.

Thu dawn danin, December 1 zana an enfiahnaah hian kawngpui sira lirthei dah 130 man a ni a; chu'ngte chu - Chanmari West-ah 85, Chhinga Vengah 29, Saron Vengah pakua, Zarkawtah pahnih leh Bawngkawn South-ah panga a ni.

Lirtheite chu man a ni tih hriattirna lehkha belin, motor registration number an chhinchhiah zel a, a neitute chu Aizawl Traffic Control Room-ah inhriattir tur leh Motor Vehicle Act Section 179-na angin Rs. 500 chawi tura tih an ni.

Hetih lai hian, kawngpuia lirthei riah tur ni lo, veng danga leng, kawngpui sîra lirthei dahte pawh man a awm palh nia thu dawn a ni a; hemi chungchanga zawhna chhángin Working Group Committee chairman Lalbiakzama chuan, thil thleng palh a awm theih thu a sawi a, "Mi ina lêngte leh mikhualte motor chu man tur a ni lo," a ti.

Lalbiakzama chuan, Mizote chu inlên pawh chi an nih avangin fimkhur a ngaih thu a sawi a, "Mikhualte pawh kan nei ṭhin a, mikhual lirthei neite chu an thlenna local council-ah in report a, local council hriatpuinain kawngpui zau laiah lirthei dah dan tur ruahmanna siam a ṭha ang," a ti a; chutiang tur chuan ruahman an tum thu a sawi.

December 2, Inrinni zanah erawh chuan kawngpui sira lirthei riah a awm leh awm loh endikin an thawk chhuak lo tih a sawi bawk.

Traffic SP C Lalthanmawia chuan, lirthei kawngpuia riah a awm leh awm loh endikna chu a khát tâwkin veng hrang hrangah enfiah ṭhin a nih tur thu a sawi.

C Lalthanmawia chuan, Aizawla lirthei tâwt lutuk tiziaawm tur leh lirthei neitute garage nei tura ngenna chu thlahdul theih a ni tawh lo nia sawiin, a ṭul dan azirin kenkawh zel a nih tur thu leh, an thil tum tihhlawhtlin nana mipuite zirtir turin an khauh telh telh dawn thu a sawi bawk.