Engineer-te'n secretary-ah an awm belh theihna turin hmalak an rel

Indian Engineers' Federation (NE Region) chuan December 2, Inrinni khan PWD Engineer-in-Chief pisa conference hall-ah Annual Council Meeting an nei a; engineer-te'n Mizoram sorkarah secretary post an neih belh theihna atan hmalak an rel.

Meeting hi Power & Electricity E-in-C Lian­nghing­lova Pachuau-in a hmanpui a; Liannghinglova Pachuau chuan, engineer-te chu ram hmasawnna atan nasa zawka thawk tur leh ruahmanna fel tak siam a, chung ruahmanna an siam anga hnathawk turin a fuih.

Meeting-ah hian India ram state tin aṭanga harsatna an tawh mek leh hmasawnna tura an hmachhawpte ngaihthlak a ni a, sawiho zui a ni. Mizoram Engineer Service Association (MESA) chuan, Mizoram sorkar hnuaia hmasawnna hnathawhna kawngah lungrual taka an thawhho thu an sawi.

INDEF thil phût zinga mi, 'Heading and manning of technical department/secretary by technical personel' tih chu Mizoram sorkar hnuaiah secretary-ah engineer pakhat dah mek a nih laiin, engineer de­partment erawh pakhatmah enkawl a nei lo chu hriat­thiam har an tih thu an tarlang.

INDEF chuan, Mizoram sorkar hnuaia engineer secretary hna chelhte'n engineer department pakhat tal an chan theihna atan leh MESA member pahnih dang secretary an awm theihna atana hmalak an rel a ni.

Meeting-ah India ram puma Indian Engineers' Federation chairman C Debnath leh Institute of Engineers (India)-a direc­tor general Maj. Gen. S Bhattacharya-te pawh an tel a ni.