Nau piang zat leh mitthi zat chhinchhiah dan thar zirho

Sorkar laipuia Ministry of Health and Family Welfare leh Registration of Births and Deaths duh dan angin, December 1, 2017 khan Aizawl Civil Hospital conference hall-ah nau piang leh mitthi chhinchhiah dan kal­phung thar inzirtirna neih a ni.

'Training on Civil Registration for Medical Certification of Causes of Deaths and HMIS New Formats for Medical Officers of Health Facilities' hi Aizawl West chief medical officer Dr Lalthanga'n a kaihruai a, Aizawl East leh Aizawl West district chhunga sorkar doctor-te leh private hospital-a doctor-te an tel a; Economics and Statistics deputy director Biakchungnungi'n thil pawimawhte a sawifiah.

Damdawi-ina thi zawng zawngte an thih chhan dik tak International Classification of Diseases 10th. Edition anga record a, report leh certificate pek dan turah, Dr Zorinsangi'n Medical Certification of Causes of Deaths chungchang a sawifiah a; Physician’s Manual on Medical Certification of Causes of Deaths chu medical officer-te hnenah sem a ni bawk.

Mizorama nau piang leh thi saa nau piang (stillbirth) leh, mitthi zawng zawngte kim taka report a nih a, nau piang leh mitthi zawng zawng­ah certificate pek chhuah a nih theih nan National Health Mission (NHM) leh Economics and Statistics department-a Registration of Births and Deaths chu an thawkho mek a ni.

Thawhhona angin, civil registration tih theihna turin sorkar damdawi-in 88 leh mimal dam­dawi-in 15-ah Registration of Births and Deaths Units hawn a ni a, chu'ng damdawi-in 103-a civil registration kalpuina sum mamawh chu NHM-in a tum a ni.