Online transaction, ATM leh OTP-ah Police-in fimkhur turin mipui an chah

Mizoram Police chuan thuchhuah siamin, tunlai thiamna sang zelah Mizoramah cyber crime lam thubuai a tam telh telh thu an tarlang a, "A bik takin online-a sum inbumna lam complaint kan dawng chho ta zel a ni," an ti. Hei vang hian online transaction leh ATM card leh OTP chungchanga mipui zawm tur an tarlang a ni.

    UPI hmang phone app (Gpay, Paytm, Freecharge, etc.) hmangin hmelhriat loh pawisa thawn suh, inbumna a tam.

    I phone-ah heng UPI app i hmang a nih chuan, i phone chu i fate/tute, etc. online games khelh nan hmantir suh. An tum vang ni loin an games khelh leh i UPI app an link palh thei.

    Online-ah inbumna a tam a, 'Special Offer', 'Promotion', 'Sale' tih lampang hmanga phone call emaw message i dawn chuan bawhzui loh a him.

    Application i hriat chian loh phone call emaw, sms hmanga download tur an hrilh che chuan inbumna a ni tih hria la, download miah loh tur a ni.

    I ATM card mi dang hmantir suh. ATM aṭanga pawisa la chhuak turin kal thei lo pawh ni la, i mi rin ber pawh kha sum inrawlhnaah chuan a rintlak kher lo mai thei.

    I ATM card number emaw, thlalak emaw (card number, CVV, expiry date lanna) mi thawn suh. I thawn palh a nih chuan, i him zawk nan i ATM card chu block tir la, bank-ah a thar dil rawh.

    I bank registered mobile number-a OTP lo thleng chu mi dang pek loh tur. I pe a, i account aṭanga pawisa a bo chuan, bank pawhin an hmuh letsak thei lo ang che.

    Bank-in i ATM card number, CVV (ATM card hnunglama number) leh OTP an dil ngai lo; tuin emaw an dil che a nih chuan, police hnenah i report tur thu hrilh ang che.

    ATM i hmanin, a hlawhtlin (success) loh chuan ‘cancel’ hmet ṭhin ang che.