Assembly Speaker mawhphurhna sawifiah

Mizoram Legislative Assembly Secretariat chuan thuchhuah siamin, State Legislative Assembly Speaker mawhphurhna leh thuneihnate an sawifiah.

Mizoram Legislative Assembly Secretariat tarlan danin, Mizoram Legislative Assembly hi Rules of Procedure & Conduct of Business hmanga kaihhruai a ni a, chu dan chhungah chuan Speaker-in ṭha leh rem a tih angin member-te'n ro an rel a, thu an sawi ṭhin.

Speaker-in thuneihna sang tak a nei a, Rules of Procedure & Conduct of Business in Mizoram Legislative Assembly-a tarlan loh, tih tur leh sawi tur a awm a nih chuan Speaker-in thutawp a siam thei a ni.

House chhungah member-te'n an thusawiah zalenna zau tak an nei a, Indian Constitution Article 194 clause 2-a tarlan angin, member-te'n House chhungah eng pawh sawi se, Court-ah khin theih a ni lo.

Mizoram Assembly session hnuhnung berah Speaker-in session tawpna tur a khaikhawmnaah, Assembly Secretary kum tawpa pension tur chungchang a sawi chhuak a; chu chu special mention ni loin, session hall-ah thuneihna sang tak a neih anga a kutke ber Assembly Secretary pension tur chungchang a sawi lang chu thil tih awm reng a nih thu an tarlang.