Lungleia police duty turte vai liam

Lunglei SP ruahmannaa Lunglei khawpui chhim leh hmara city police duty turte chu Inrinni khan Lunglei Police Station aṭangin Lunglei High Powered Committee (HPC) vice chairman S Laldingliana, MLA-in a vai liam.

S Laldingliana chuan, Mizo Kristiante hunpui lo thleng turah harsatna thleng lo tura ṭan lak a pawimawh thu sawiin, "Dan leh thupek kenkawhnaah harsatna awm loa a kal theih nan HPC a inhawn reng a ni. Ṭan­rualna leh thawhhona ṭha nen Lunglei hi model town-ah kan siam thei ang," a ti.

Lunglei SP J Lalṭha­famkima pawhin thu sawiin, Lunglei khawpuia dan leh thupekah harsatna a awm loh nan sorkarin Gypsy thar pahnih Lunglei district tana a pekte chu Police outpost-ah dah a ni a, outpost motor hluite chu chei ṭhain, mobile patrol van atan hman a nih thu a sawi.

Lunglei SP sawi dan­in, mobile patrol van-ah hian engtik lai pawhin SI emaw ASI hoin khawpui chhung an vil reng dawn a; Lunglei khawpuiah sualna leh pawi khawihna a tlem phah a, a ralmuan phah a beisei a ni. Motor-ah hian siren, beacon light leh inbiak pawh zung zung theih nan wireless set vuah a ni.