Mamit district hmasawnna tur sawiho

Ministry of Chemicals and Fertilizer-a additional secretary Dharam Pal chuan tun hnai khan Mamit district a tlawh a, hmasawnna chak zawka a neih theihna tura hmalakpui dan tur sorkar official-te a sawipui.

Dharam Pal hian December 1, 2017 khan Mamit Tourist Lodge-ah district bawrhsap Lalbiaksangi hoin official-te'n an lo dawngsawng a; department hrang hranga hotute nen Mamit district hnufual chhan leh harsatna an tawh te, tihhmasawnna tura hmalak dan turte an sawiho a ni.

Mamit DC chuan, an district chu India ram puma district hnufual chawikan ngai thlan chhuah 115 zingah a tel thu sawiin, "Kan district-in hmasawnna kawng a zawhna tura min viltu atan Dharam Pal hi ruat a ni," a ti.

Meeting-a tarlan danin, India rama district hnufual chawikan ngai thlan chhuahte chu computer generated hmanga thlan a ni a, tehna bik hmangin Mamit district dinhmun pawh teh a ni.

Tehfung hrang hrangte chu - kut hnathawka ei zawng mahni puala ram nei lo 25%, nau paite enkawl dan 7.5%, damdawi-ina nau neih dan dinhmun 7.5%, naupang kum 5 hnuai lam ṭhang thei lo 7.5%, naupang kum 5 hnuai lam hriselna ṭhat loh vanga dinhmun 7.5%, sikul bànsan (elementary dropout) 7.5%, naupang leh zirtirtu ratio 7.5%, kawlphetha luh lohna 7.5%, inthiarna nei lo chhungkua 7.5%, kawngpui pawh loh khua 7.5% leh tui hnianghnâr lo khua 7.5% te a ni.