Central scheme-a an dikna leh chanvo bawhzui turin Union MoS-in mipui a chah

Sorkar laipuia Food Processing Industries leh Jal Shakti ministry enkawltu minister of state Prahlad Singh Patel chuan nimin khan Lawngtlai district-a Mampui khua a tlawh a; sorkar laipui hnuaia hmasawnna hnathawh hrang hrang enfiahin, sorkar laipuiin mipui tana hamṭhatna a duante an chhawr theih nan an dikna leh chanvo hriaa bawhzui ṭhin turin mipui a chah.

Mampui community hall-a khawtlang mipui nena an inkawmnaah Prahlad Singh Patel chuan, India rama district hnufualte chawi kân tuma sorkar laipui hmalaknaah minister-te'n thingtlang khua kal chilhin, an dinhmun an enfiah mek thu a sawi.

Prahlad Singh Patel chuan, Jal Jeevan Mission (JJM) hnuaia in tinin mahni ina tui an herh haw theihna tura sorkar laipui aṭanga hmalakna kal mek leh ei tur sâwngbàwl lama tuite ṭanpuina tura sorkar laipuiin ruahmanna a neihte a sawi a; sorkarin mipui tana hamṭhatna a duante an chhawr theih nan an dikna leh chanvo hre chianga bawhzui ṭhin turin mipui a chah.

Union Minister hian Mampui Middle School tlawhin, tui dah khâwlna leh inthiarnate a enfiah a; Mampui khaw daia Lai Typical Village tlawh bakah, JJM hnuaia Lawngtlai aṭanga Mampui khuaa tui pekna tur, Lawngtlai leh Mampui inkara PHE department-in tui pipe an phûm mek a endik bawk. Mampui khawtlang hruaitute'n an dinhmun lo hrilhin, an mamawhte an lo thlen a ni.

Prahlad Singh Patel hian sorkar hotute nen Lawngtlai DC conference hall-ah review meeting an nei a, Lawngtlaia sorkar hotute'n district dinhmun tlangpui leh sorkar hmalakna langsar zualte a lem nen an hrilhfiah.

Union Minister chuan, a enkawl ministry - Food Processing Industries leh Jal Shakti hnuaia mipui hamṭhatna tur ruahmante chu mipuite’n an chhawr theih nan theihtawp chhuah turin sorkar hotute a chah.

Prahlad Singh Patel chuan, ei tur sâwngbàwlna lam buaipui chu eizawnna ṭha tak a nih thu sawiin, a tui mite tan Food Processing Industries ministry-ah mahniin ruahmanna thehluh theih a nih thu a sawi bawk.

Inkawmhonaah hian LADC leh tlawmngai pawl hruaitute'n Union Minister hnenah hian an mamawh hrang hrang an lo thlen a ni.

Union Minister hi State Protocol officer K Laltlawmlova'n a ṭawiawm a, nimin vêk khan helicopter-in Aizawlah a lêt. Vawiin hian zingah Seling Phaibawkkawna SLTI leh Incubation Centre a tlawh dawn a, chawhma lamah sorkar hotute a kâwm ang a, chawhnuah Mizoram a chhuahsan ang.