UPC (NEI) No Tobacco Week hawng

United Pentecostal Church (UPC), North East India hnuaia Aizawl East District-a Thianghlimna Committee chuan December 5, Thawhṭanni zan khan Vanapa Hall-ah No Tobacco Week hawnna inkhawm an buatsaih a, Health & Family Welfare minister Dr R Lalthangliana'n a hmanpui.

Hawnna inkhawm hi UPC Aizawl East District treasurer Rev. H Lalropuia'n a kaihruai a; Health Minister chuan, thianghlimna lama UPC (NEI) hmalakna fakin, entawn tlak a tih thu a sawi a, "Cancer vei leh HIV/AIDS vei tam lamah India ramah hma hruaitu kan ni hi a lungchhiatthlak tak zet. Kohhran hi platform lian tak a nih avangin kohhrante'n theihtawp kan chhuah a ngai a ni," a ti.

Dr R Lalthangliana chuan, zûk leh hmuamin sum a tihral chak bakah, hriselnaah nghawng ṭha lo tak a nei tih sawiin, "Hriselna hloh hi engkim hlohna a ni tih thupuiah nei ila a duhawm hle. Mizorama zûk leh hmuam ti mekte hian nghei vek thei se Mizoram hian hma a sawn phah ka ring," a ti a; zûk leh hmuam donaah peih rei leh daih rei a ngaih thu sawiin, a tàwp thlenga ṭang turin kal khawmte a chah.

No Tobacco Week hawnnaah hian UPC Aizawl East District superintendent Rev. KVL Hmangaihkima'n thuchah sawiin, secretary Rev. R Laltlankima’n hmalakna chanchin a sawi a; 'Thianghlimna' tih thupui hmanga film tâwi insiamsiak result puan niin, lawmman sem nghal a ni.
Film tawi siama intihsiakah hian Khawhai Bial PYD pakhatna an ni a, pahnihna chu Serchhip Dinthar Veng PYD niin, pathumna chu College Veng PYD an ni.