Sorkar puihna tel lo chuan infiamnain hma a sawn thei lo - AIFF President
All India Football Federation (AIFF) president Kalyan Chaubey chuan nimin khan Aizawl a rawn tlawh a, Mizoram Football Association (MFA) leh district football association hruaitute nen Aijal Club-a an inkawmnaah, sorkar puihna tel lo chuan infiamnain hma a sawn tak tak theih loh thu a sawi.
MFA honorary secretary Lalnghinglova Hmar kaihhruai inkawmhonaah AIFF President chuan, state hrang hrang sport association-te pui turin sorkar a che ṭhin tih sawiin, "Sorkar puihna tel lo chuan infiamnain hma a sawn tak tak thei lo. Infrastructure leh thil dang mamawh tam tak a awm a ni," a ti.
Kalyan Chaubey chuan AIFF-in hmarchhaka football hmasawnna atan hmalak a tum tih sawiin, "Naupang zawkte zirtir thei turin 'A' license coach a tam thei ang ber chher kan tum a, chumi atan chuan instructor kan rawn tir dawn," a ti a, Mizoram bikah a ṭum khatnaah 'A' license coach mi 50 chher an tum thu a sawi.
Union Education Minister, FIFA leh AIFF-in thawhhona an ziah thu sawiin, "Thawhhona hmang hian sikul 1,40,000-ah grassroot football kalpui a ni dawn. A kum khatnaah sikul 10,000, kum hnihnaah sikul 30,000, kum thumna leh kum linaah sikul 50,000 ve veah kalpui tum a ni a, Mizoramah pawh kalpui a ni ang," a ti.
Kalyan Chaubey chuan tun ṭum a rawn zin chu a tàwpna tur a ni lo tih sawiin, "Ka term kum li chhung hian a tlem berah ṭum li ka rawn zin dawn. In mamawh leh hmalakna atana ṭulte hre turin inkawmho a ngai a ni," a ti a, mamawh leh tulte bawhzui zel a nih tur thu a sawi.
AIFF President chuan, Mizoram chu football-ah international thlenga India tana thawh hlâwk a nih thu sawiin, "Tun hma chuan hmarchhak football sawiin Manipur bak sawi a ni ngai lo. Tunah chuan Mizoramin hma a sawn tawh tak zet," a ti.
MFA president Lal Thanzara pawhin thu sawiin, "AIFF President ni laiin Mizoram a rawn tlawh ṭum khatna a ni a, kan tan chuan ni ropui leh chhinchhiah tlak a ni. Mizoram hi football tuipui state kan ni a, khawpui leh thingtlangah an khel vek a ni," a ti a; AIFF President zin chuan Mizoram football-ah hmasawnna a thlen ngei a beisei thu a sawi.