Lehkha khawnga ṭhutthleng siam hawng

Governor Hari Babu Kambhampati chuan nimin khan Raj Bhavan kawtah lehkha khawng bâwm chhia hmanga ṭhutthleng siam a hawng a; lehkha khawng chhia hmanga ṭhutthleng siam chu environment chhe zel tur vênna tura hmalakna pawimawh a nih thu a sawi.

Dr Hari Babu Kam­bhampati chuan, India ramin Sustainable Deve­lopment Goals tihlawhtling turin ṭan a lak mek thu a sawi a, "COP 27 (Conference of the Parties)-a LiFE (Lifestyle for Environment) Cam­paign thil tum pawh tihhlawhtlin a tum. India ram chuan bawlhhlawh siam tlêm leh bawlhhlawh sâwngbàwlna uar zel a, Green Economy nih a tum a ni," a ti.

India ram chu G-20 (Group of 20) president a ni mek a, G-20 ramte'n sik leh sa chungchang an ngai pawimawh dawn tih sawiin Larsap chuan, "India chuan sik leh sá leh kan chhehvel tuamtu boruak chhe zel siamṭhatna turin nasa zawka ṭan lak a tum mek a ni," a ti a; India khua leh tui, a bikin ṭhalaite'n ni tin khawsaknaah leilung tichhe thei thil an hman loh tial tial a ṭul thu a sawi.

Sorkar thuchhuah tarlan danin, ṭhutthlengte hi Tetra Pak company-in an siam a ni a; lehkha khawng, bawnghnute, theitui leh thil dang fûnna chhia hmanga an siam a ni.