Lungleiah mock drill huaihawt a ni

Lunglei District Disas-ter Management Authority (DDMA) chuan nimin khan Lunglei khawpuiah lirnghing a thlen thulha chhanchhuah hna thawh dan tura a taka enchhinna, Earthquake Mock Drill an huaihawt.

Mock Drill-a tel tur hian Guwahati aṭangin National Disaster Response Force (NDRF) 1st Battalion deputy commandant HR Yadav leh NDRF sipai 23 an rawn kal a ni.

Chawhma dar 11-ah lirnghingin Lunglei khawpui a sâwi angin mock drill neih niin, rálkhèl dár (siren) tihrîk a ni a; chhiatna thlen theih dan tur, thi leh hliam awm theih dan tur, chhanchhuah hna thawh dan tur leh damdawi lama inenkawl dan turte a takin entir a ni.

Mock drill-ah hian NDRF, State Disaster Response Force, Police, Fire & Emergency Services, Health department, MPRO, Quick Response Team, Traffic Police, PHE department, Power & Electricity department, VC leh YMA-te an tel a; Saikuti Hall, Convention Centre leh Lunglei High School leh Civil Hospital-te hman a ni.

Mock drill tih zawhah Lunglei DC Conference Hall-ah thlir lêtna hun buatsaih nghal a ni a; NDRF deputy commandant HR Yadav leh incident commander-te'n report an pe. NDRF hotu chuan, inpuahchahna leh hmalak dante ṭha an tih thu leh mawhphurtute'n an chanvo ṭha takin an hlen nia an hmuh thu a sawi.

Lunglei SP Rex Zarzoliana Vanchhawng chuan, chhiatna a thlenin, chhanchhuah hna thawhnaah tlawmngaia chhanchhuah hna thawktu (community volunteer) an pawimawh thu te, VC, YMA leh kohhran kaltlangah inzirtirna uar zawka kalpui a ṭul thu te, chhiatna hmuna mipui pungkhawm tur vên vat a ṭul thute a sawi. Member-te'n an hmuh dan an sawi bawk.