5G pekna atan Aizawla hmun 110 thlang tawh

Information and Commu-nications Technology (ICT) minister Robert Romawia Royte kaihhruaiin nimin khan 'Consul-tative Meeting on Readiness of 5G Roll out in Mizoram’ chu e-Governance Conference Room-ah an ṭhukhawm. 5G network pek chhuahna atan Aizawla hmun 110 thlan a nih tawh thu tarlan a ni.

Tarlan danin, Reliance Jio company-in Aizawlah 5G network pek chhuahna remchang tur hmun 56 an thlang tawh a, chu'ng zinga hmun 30 chu zir chian a ni tawh. Airtel pawhin Aizawla hmun 54 an ruahman tawh bawk.

Robert Romawia Royte chuan, 5G chu Mizorama hman a nih thuai theih nan telecom service provider-te chu chak zawka hma la turin a hrilh a, "Krismas present atan Aizawl leh Lunglei khawpuiah tal kumin chhungin 5G network hman a nih theih nan theihtawp chhuah ang che u," a ti a; harsatna an neih chuan puih a inhuam thu a sawi.

Sorkar laipuia Department of Expenditure chuan Special Assistance to State for Capital Investment (SACSI) 2022-23 hnuaiah Mizorama district leh RD block zawng zawngah telecom tihchangtlunna atan cheng vbc. 50 a pe a ni. India ram khawpui eng emaw zat leh airport ṭhenkhatah Reliance Jio True 5G leh Airtel 5G Plus-te hman ṭan mek a ni a, hmarchhakah chuan Guwahati a thleng tawh.

Ṭhutkhawmah hian Cellular Operators Association of India, Digital Infrastructure Providers Association, Reliance Jio leh Airtel aiawhte bakah, a kaihhnawih sorkar department/agency hotute an tel a ni.