Thisen pe turin hriselna ṭha a ngai - Health Minister

Health & Family Welfare minister Dr R Lalthangliana chuan, thisen pe turin hriselna ṭha neih a ngaih avangin, taksa vawng uluk turin zirlaite a chah.

Dr R Lalthangliana hian Pachhunga Uni­versity College NSS-in golden jubilee puala nimina an hmuna thisen pek rûnpui an huaihawt a hmanpuinaah thu sawiin, thisen pe turin hriselna ṭha neih a ngaih thu a sawi a, "Hriselna atan kea kal uar a pawimawh a, ei tur tui ringawt aiin, taksa tana ṭha ei nacháng hriat a ṭul," a ti.

Mizoram chu ziak leh chhiar thiam tamna, state rálmuang leh Kristian ram a nih avangin hriat a hlawh tih sawiin Minister chuan, "Hetiang a nih rual hian thiamna tak tak neih kawngah hma kan sawn a ngai. All India service leh central service mai bakah, Zoram Medical College leh JICA project hnuaia din tur Cancer Superspeciality Hospital-ahte thiamna bik neih ngai thilah ram leilung fate lâk tur an awm lo ṭhin hi a rualawhthlak a ni," a ti a; PUC chu college entawn tlak ni zel tur leh NSS ti ṭha ber ni zel turin duhsakna a hlân a ni.

Thisen pek hawnnaah hian Civil Hospital, Aizawl Blood Bank consultant Dr C Zohmingliani, PUC principal Prof. H Lalthanzara leh HDFC Bank aiawh John Varte ten thu an sawi bawk.

PUC hian academic session 2022-23 kal mekah thisen unit 521 an pe tawh a, thisen unit 1,100 pek tlin tumin hma an la mek a ni.