Battle Honour of Chhamb hmang

5th Assam Regiment aṭanga pension-te intèl khawmna, Ex-Fighting Fifth Association (EFFA) chuan kum 1971-a India leh Pakistan indonaa India chak hriatrengna, Battle Honour of Chhamb pualin nimin khan Synod Conference Centre-ah hun an hmang a, Home minister Lalchamliana'n a hmanpui.

Lalchamliana chuan, sipai bángte leh an thlah kal zelte chu Mizoram tan an thawh hlâwk hle tih sawiin, "Mizoram sorkarah te, khawtlang nun leh kaihhruaina kawngah te, kohhran rawngbawlna lamah leh politics thlengin sipaia ṭang tawhte thawh hlâwkna tam tak sawi tur a awm," a ti.

Home Minister chuan, sipai leh an chhungte chu inthunnna aṭanga zi chhuak an nih angin, kawng hrang hrangah hma hruaitu ni a, thil ṭha tihnaah mi dang kawhhmutu ni turin a chah a, "Sipaia ṭan hi vawiin thlengin eizawnna ṭha tak a ni," tiin, Agniveer scheme chu Mizo thalaite’n an ngaihsak a ṭul thu a sawi.

Central service leh sorkar laipuia hna hrang hrangah Mizo tling an awm loh chhan nia a hriat sawiin Lalchamliana chuan, "Mizoram sorkarin a hnuaia thawkte dinhmun a tihṭhat êm vangin kan ṭhalai lehkhathiamte hian hmun danga thawh leh hna zawn an duh lo em aw tiin ka ngaihtuah. Manipur-a kan Zo hnahthlakte chu central sorkar office hrang hranga group B lamah kum tin an tling a, Mizoram aṭanga kan ṭhalai tling an awm meuh lo hi ngaihtuah zui a ṭul hle a ni," a ti.

Intawhkhawmnaah hian sipai bángte bakah, an thihsan hmeithaite an tel. Chhamb Honour of Battle hi kum tin December 5-ah lawm ṭhin a ni a, kuminah chuan nimin khan hman a ni.