MP Rosanga'n Mizoram harsatna a thlen

Lok Sabha MP C Lalrosanga chu nimin khan Parliament thlasik ṭhutkhawm vawiina ṭan tur puala National Democratic Alliance-a tel MP-te'n thawhho dan tur an sawihonaah a tel a; Mizorama kuhva chíngtute leh Bangladesh aṭanga Zo hnahthlak raltlante chungchangah hma la turin NDA hotute a ngen.

Ṭhutkhawm hi Parliamentary Affairs minister Pralhad Joshi-a'n a kaihruai a; C Lalrosanga chuan, Mizorama kuhva chíngtute'n Assam-a kuhva hring phurh luh leh hralhnaa harsatna an tawh dante a sawi a, "Assam-ah Mizoram leh Tripura thar kuhva hring hi danchah a nih avangin a chíngtute'n harsatna nasa tak an tâwk a ni," a ti a; hemi chungchang hi House-a au chhuahpuina hun pe turin a dil a ni.

Bangladesh rama tharum thawhna avanga Mizoram chhim lama sahimna zawnga Zo hnahthlak Mizorama lutte hriatthiam leh chhawmdawl an ngaih thu sawiin Lalrosanga chuan, "Ramri vengtu BSF hote pawh Bangladesh aṭanga rawn tlan lutte hi ngaihhnathiamna lantir tura hriattir a ṭul," a ti a; Zo hnahthlak rawn tlan lutte chu dimdawi taka en turin sorkar laipui hotute a ngen a ni.