MNF sorkar hnuaiah Mizoramah Dan anga rorelna a bo - Congress party

Mizoram Pradesh Congress Committee (MPCC) chuan thuchhuah siamin, December 2018-a MNF kaihhruai sorkar a din hnuah Mizoramah dan anga rorelna a bo a, Mizoram dinhmun a chhe tial tial niin an tarlang.

Congress party chuan, MNF sorkar a pian hnuah Mizoramah rorelna fel hmuh tur a awm lo nia sawiin, "Danin ngaih pawimawh a hlawh lo a, MNF sorkar hnuaiah dan ang taka rorelna (rule of law) a bo zo a, Mizoram dinhmun a chhe tak zet ta a ni," an ti.

MPCC chuan, tun hnaia Mizoram tlawhtu Union minister of state John Barla-a'n Ministry of Minority Affairs hnuaiah cheng vbc. 1000 chuang Mizoram sorkar hnenah pek a ni tawh a, mahse, Mizoram sorkarin sum hman dan report (utilisation certificate) pek tur a neih loh thu a sawi tih an tarlang a; Union minister of state dang Prahlad Singh Patel pawhin cheng vbc. 75 sénga siam Kolasib district-a Mega Food Park-in a rilru a tihnat thu a sawi tih an tarlang bawk. "Heng zawng zawng hi MNF tihchingpen vek a ni," tiin, State Referral Hospital leh Tuirial Hydel Project ang bawka an sawpchhiat an hlauh thu an sawi.

Lunglei Zohnuaia cheng nuai 65 hmanga Science Centre tur PWD-in an sak mek enkawltu, work supervisor atan Chief Minister leh bialtu MLA duh danin HS Laltlanzara, Lunglei Zotlang dah a ni tih sawiin MPCC chuan, "Hei hi sorkar kalphung kalh tlat a ni a, MNF sorkarin dan an zah lohzia leh sorkar hnathawkte an rin lohzia tichiangtu a ni," an ti.