Zirna suasamah MNF sorkar puh

ZPM ṭhalaite chuan, School Education minister Lalchhandama Ralte-in December 2, 2022-a Model Middle School Darlawnah, 'Zirna ṭha zawk sorkarin a chhawp' tia a sawi chu pawm harsa an tih thu sawiin, MNF sorkarin zirna an suasam mek zawk nia an ngaih thu an tarlang.

ZPM Ṭhalai thuchhuah chuan, Education Minister-in zirna ṭha zawk sorkarin a chhawp anga a sawi chu pawm harsa an tih thu tarlangin, "MNF sorkar hian SEDP hnuaiah zirtirtu atan qualify lo tam tak, an party-in an duhsak zawngte zirtirtu atan an la a, MNF ministry hian Mizoramah zirna a suasam mek zawk a ni," a ti.

MNF sorkar hnuaiah zirna lamah Mizorama thil la thleng ngai lo, thil duhawm lo a tam tawh hle nia sawiin ZPM Ṭhalai chuan, 'Party unit-in zirtirtu hna lakna advertisement an chhuah te, party unit-in zirtirtu hna an laka appointment an pêkte pawh a tel," an ti a; chutiang chu chhunzawm tawh lo turin Education Minister hnenah ZPM Ṭhalaiin ziakin an thlen hial tawh tih an sawi.

ZPM ṭhalaite chuan, "MNF ministry hnuaiah zirna suasam a ni tih hi ZPM Ṭhalai dinna a ni," tiin, MNF sorkara zirtirtu lak leh zirna chungchang chu ngun takin an thlithlai reng dawn tih an tarlang a ni.