KHAWTHLIR

T
isen pe
Pachhunga University College NSS chuan an college kum 50-na pualin nimin khan an hmunah Civil Hospital, Aizawl tan thisen unit 112 an pe a, petute mipa 80 leh hmeichhia 42 an ni. JL Higher Secondary School NSS pawhin Civil Hospial blood bank-ah thisen unit 26 an pe a, petute hmeichhia 14 leh mipa 12 an ni. KṬP, Sihphir Bial member mipa 30 leh hmeichhia palite pawhin Synod Hospital tan thisen 34 an pe bawk.

Khuaiin zûk hlum
Lalpantluanga Ralte (52), Chawngtlai chu November 4, 2022 khan a ramkalnaah khuaiin a zûk a, Thawhṭanni zan zanlai pelh hnu, November 6, 2022 zing dar 1 khan inenkawl tura Aizawl panpui a nih laiin a hliam tuar loin a thi. Lalpantluanga hian khuai zûkna chu ná a tih avangin November 5, Thawhṭanni khan Khawzawl damdawi-inah hruai a ni a, Aizawla enkawl tura tih niin, Aizawl panpui a nih laiin a thi a ni.

Governor & AIFF hotu
Governor Hari Babu Kambhampati leh All India Football Federation (AIFF) president Kalyan Chaubey te chu nimin khan Raj Bhavan-ah an inkâwm. Governor chuan, football tihhmasawnna turah Mizoram tana thil tih theihte ngai pawimawh turin AIFF President a ngen a ni.

Winter workshop
Information and Public Relations department leh Mizoram Art Development Society chuan nimin khan Aizawl Art Gallery-ah Mizoram Art Development Society Winter Workshop an buatsaih a, IPR joint director PB Lianthangpuii'n a hawng. Zirhonaah hian MADS member 65 an tel a, November 9, 2022-ah khâr a ni ang.

Sarang endik
Siaha District Single Use Plastics Enforcement Team chuan nimin khan additional DC Lalnunmawii hoin Siaha khawpuia dàwr leh chawhmeh zawrhna hmunte an fang a, hman khat daih sarâng zawrh leh hman a awm leh awm loh an endik. Hman khat daih sarâng kg. 26 an man a, pawisa an chawitir tling khawm chu Rs 10,100 a ni.

PC party-in mualphothlak an ti
Peoples' Conference party chuan thuchhuah siamin, Union Minister-in Zoram Mega Food Park chungchangah a rilru nat thu tun hnaia a au chhuahpui chu Mizoram tan mualphothlak an tih thu an tarlang. PC party chuan, "Zoram Mega Food Park buaipui a, tihhlawhtlin ngei tuma mi ṭhahnemngaite hmalakna tihphuisuina leh Mizo mipuite'n kan hriat zau zawkna tura Mizoram sorkarin ke a pên tâwk loh avanga hluihlâwn thawthánga a awm mek hi hriatthiam harsa kan ti tak zet a ni," an ti.

MLA-in tanpuina pe
Tuichawng bialtu MLA leh BJP Chakma District Committtee president Dr Buddha Dhan Chakma chuan nimin khan Tlabung damdawi-in tan oxygen concentrator leh cylinder bakah, kutkawr ṭhahnem tak a hlân.

Calendar tlangzarh
Assembly speaker Lalrinliana Sailo chuan nimin khan a pisaah Khawlian khuain nakkuma an khaw kum 100 tlinna tur puala an siam Centenary Calendar 2023 a tlangzarh.