AR-in heroin, ralthuam leh pawisa man

Aizawla hmunpui nei 2nd Assam Rifles leh Excise & Narcotics department mite chuan December 5, Thawhṭanni khan Falkland Vengah heroin gram 236 an man a, a neitua puh mi pali an man nghal. Heroin an man hi Rs 1,18,00,000 hû a ni a, Excise & Narcotics-in thubuai an ziak lut a ni.

Lungleia hmunpui nei Assam Rifles sipaite chuan December 3, 2022 khan Siaha district-a Tipa (Tuipang) bulah ralthuam eng emaw zat an man a, rálthuam kengtu Myanmar lam mi pali an man bawk.

AR-in ralthuam an mante chu - .22 rifles pakhat, NX 200 antenna pakhat, .22 silai mu 60, .177 silai mu báwm thum, catridge 500, gun powder kg. 22.42, airgun leh hmanraw dangte a ni.

December 3 vêk khan Assam Rifles-te chuan Zawngling khua, Siaha district-ah Myanmar pawisa leh India pawisa eng emaw zat an man a, pawisa kengtu hnam dang pahnih nen Customs department hnenah an hlan.

Pawisa an mante chu - India pawisa Rs 2,33,910 leh Myanmar pawisa Kyat 73,43,700 (Rs 2,84,568.72 hû) a ni.