Sorkar ding tawhte party sorkar an ni - ZPM President

ZPM president Lal­lian­sawta chuan nimin khan Jeddel Picnic Spot-a Aizawl West-I ZPM Block-II a hawnnaah thu sawiin, Mizorama sorkar ding tawhte'n mipui náwlpui an huap zo lo a, party sorkar an nih zel thu a sawi.

Lalliansawta chuan, Mizoramah political party tih theih mai chu 30 vel a ding tawh tih sawiin, "Sorkarna siam chu tlemtê an ni. Sorkarna siamtute aṭanga kan hmuh chu party sorkar a ni ṭhin. NLUP, SEDP leh a dang dang kan han ti a, mahse, party mite bak a huam hleithei lo. Heng pawisate hi a neitu dik tak chu mipui kan ni," a ti.

Kum 76 vel chhung political party hruàiin Mizo mipui an awm tawh tih sawiin Lalliansawta chuan, "A nihna takah chuan party sorkar hruaiin kan awm. Vawiin thlenga kan hmuh chu mipui sorkar ni loin, party mite chauh lenna hmun a ni," a ti a; ZPM chu mi tin huapzo, mipui sorkar siam turin a inbuatsaih thu leh Mizoramin bung thar chuang kai turin an inbuatsaih mek thu a sawi.

ZPM President chuan, lal huaisen leh lal ṭha hnuaiah khaw mite'n malsawmna an dawng a, an pung ṭhin tih sawiin, "Lal fel lo, rethei leh pachhiate ngaihsak lo, lal inluling ṭhin an neih chuan mipui an rethei ṭhin," a ti bawk.